“Formula-1” dünyasında çox maraqlı hadisələr yaşanmaqdadı.

Beynəlxalq Avtomobil Federasiyası iştirakçı komandaların maliyyə hesabatların dərc olunmasını bazar ertəsinə - oktyabrın 10-na təxirə salıb. Qurumun yaydığı məlumatda bunun son göstəriciləri dəqiqləşdirmək zərurəti ilə bağlı olduğu bildirilir.

Bir neçə gün əvvəl “Red Bull” komandasının ötən mövsüm maliyyə reqlamentini pozması ilə bağlı xəbər yayılmışdı. Sonra “Aston Martin”in də ötən il xərclər tavanını aşdığı deyildi. “Daily Mail” iddia edir ki, “Red Bull” həqiqətən reqlamenti pozub, sadəcə, pozuntunun miqyası o qədər də böyük deyil. Adı çəkilən qaynağa inansaq, “Red Bull” 147,4 milyon dollarlıq büdcə tavanını cəmi 1,5 milyon aşıb ki, bu da prosedur pozuntusu olsa da, müəyyənləşdirilən büdcəni 5 faiz keçmədiyinə görə Avstriya komandasının ciddi cəza alacağı gözlənilmir. Amma büdcə pozuntusu 5 faizdən artıq olan istənilən komandanı ümumi hesabda yerini itirməyə qədər ən sərt cəzalar gözləyir.

Xatırladaq ki, “Red Bull” 2021 mövsümündə “Mersedes”dən 28 xal geri qalmaqla Mühəndislər kubokunda 2-ci yeri tutub. Dünya çempionu adını isə “Red Bull”un niderlandlı pilotu Maks Ferstappen qazanıb.