“Real”ın qapıçısı Tibo Kurtuanın son durumu açıqlanıb.

"Football-plus.az" xəbər verir ki, o, La Liqanın 9-cu turunun “Barselona” ilə oyununu da buraxacaq.

“Marca” qəzetinin məlumatına görə, 30 yaşlı futbolçu zədəsini tam sağaltmayıb. Buna görə “El Klasiko”da iştirak etməyəcək. “Real”ın tibb korpusu Kurtuanın sağalmasına diqqətlə yanaşmaq və onu komandaya məcburən cəlb etməmək qərarına gəlib. “Barselona” ilə prinsipial və vacib oyunda madridlilərin qapısını Andrey Lunin qoruyacaq. O, La Liqa və Çempionlar Liqasının qrup mərhələsinin son oyunlarında Tibonun əvəzinə qapını qoruyub.

Oktyabrın 16-da Madriddəki “Santyaqo Bernabeu” stadionunda keçiriləcək “Real” – “Barselona” matçı Bakı vaxtı ilə saat 18.15-də başlayacaq. Əzəli rəqiblər hazırda La Liqanın turnir cədvəlinə hərəyə 22 xal toplamaqla şərikli başçılıq edirlər. “Barselona” topların daha yaxşı fərqinə əsasən 1-ci yerdədi.