İnsan üçün ən ağır dərd ümidlərinin qırılmasıdı. Bəzən uğur əldə edirsən, onun eyforiyasına qapılırsan.

Düşünürsən ki, bundan sonra hər şey əla olacaq. Amma sonradan keçmiş günlərini xatırlayırsan. Deyirsən ki, kaş elə keçmişdəki mövqeyimdə qalardım, heç buralara gəlməzdim.

Bizim “Mingəçevir” də ümidlərimizi belə qırır. Niyə bizim? Çünki şəxsən mən Region Liqasında çıxış edən, bu komanda “Energetik” olan zaman 5-6 oyununu yerində işıqlandırmışdım. Hətta bölgə klubunun "E-sport" komandasının da üzvü olmuşdum. “Energetik”i AFFA-nın təşkil etdiyi E-milli liqada təmsil edirdim.

“İşıqçılar” “Mingəçevir" olanda çox şeyin dəyişəcəyinə ümid edirdim. Həqiqətən şəhər əhalisi komandanın peşəkar futbolda olması üçün əlindən gələni edirdi. Region Liqasında hər ev oyununa 2-3 min azarkeş gəlirdi. Klubun prezidenti Ruslan Həmidov hər həftə saytlara, qəzetlərə açıqlama verirdi ki, komanda diviziona gəlsə, daha yaxşı işlər görərik. Region Liqasının 1/4 finalında, “Cəbrayıl”la oyunda yaşananlara görə az qala hamıdan üzr istəmişdi. Futbolçuların peşəkar olmadığını bildirib, daha peşəkar liqada, yaxşı maliyyə ilə səviyyəli komanda formalaşdıracaqlarını dilə gətirirdi. “Futbol+” qəzeti olaraq biz də onların istəklərini, arzularını ictimaiyyətə çatdırırdıq. Bu, mən və digər həmkarlarımın işidi. Çalışırıq ki, hər şeyi peşəkar səviyyədə edək. Bəzən səhvlərimiz də olur, bizdən asılı olmadan yanlış informasiyalar da dərc edirik. Lakin səhvlərimizə görə kimlərisə günahlandırmır, bəhanələr axtarmırıq.

Çox çək-çevirdən sonra “Energetik” “Mingəçevir” adı ilə 1-ci diviziona buraxıldı. Klubda İdarə Heyəti formalaşdı. Ordan cəmi 2 nəfər tanıyırıq. Sədr Rövşən Əhmədov və köməkçisi Ruslan Həmidovu. Digərlərinin kim olduğunu bilmirik. Bu, informasiya bir Allahda, bir də Rövşən müəllimlə köməkçisində var. Mənə hələ də çatmır ki, bu sədr müavini nəyə lazımdı? Heç yaranma tarixi 1 il olmayan klubda sədr nə işlər gördü ki, ona köməkçi də təyin olunsun? Bu o demək deyil ki, Ruslan Həmidov qıraqda qalmalı idi. Heç olmasa, prezident olardı. Sədr müavini nədi, sən Allah? Onsuz da idarəçiliklə bağlı bütün işləri Ruslan Həmidov görürsə, niyə kiminsə köməkçisi olmalıdı?

Keçək başqa məsələlərə. Komandanın formalaşması bir müddət çəkdi. Gah dedilər, sənədləşmədə, gah da dedilər, Ədliyyə Nazirliyində problem olub. Birtəhər hər şeyi yoluna qoydular. Bundan sonra baş məşqçi axtarışları başladı. Rövşən Babayevlə danışıqlar aparıldı, amma razılıq olmadı. Sonra “Energetik”in baş məşqçisi Zaur Qarayevin köməkçisi Azər Həşimov komandanın çalışdırıcısı oldu. Sevindik! "Dostumuz, tanışımızdı" deyərək, təbrik etdik. Ümidləndik ki, “Mingəçevir”in gələcəyi işıqlı olacaq. Amma sən saydığını, say, gör fələk nə sayır?

Birinci divizionda 7 tur arxada qalıb. Komanda 7 xalla 15 klub arasında 11-ci pillədə qərarlaşıb. İlk turda 3200 azarkeşin önündə “Neftçi-2” darmadağın edildi - 4:1. Düşündüm ki, "Araz Naxçıvan”la çempionluq uğrunda mübarizə aparacaq. Amma sonrakı oyunlar ümidləri puç etdi. “İşıqçılar” bu mövsüm cəmi 2 qələbə qazanıb. Demək olar ki, heyətində peşəkar futbolçu olmayan “İmişli” səfərdə darmadağın edilib - 6:0. Son turda isə doğma meydanda “Sumqayıt-2” ilə heç-heçə qeydə alınıb - 1:1.



Komandanın 4-5 oyununu PFL-in “yutub” kanalından izləmişəm. Belə qənaətə gəlmək olar ki, “Mingəçevir”ə xala xətrin qalmasın prinsipi ilə oyunçular cəlb olunub. Rövşən müəllim deyirdi ki, mingəçevirlilərdən ibarət, meydanda can qoyan kollektiv formalaşdıracağıq. Düzdü, bu sözə əməl olunub. Amma “Energetik”in vaxtında əsas heyətə düşməyən oyunçular indi “Mingəçevir”in “ulduzları” olublar. Deyəsən, Azər Həşimov öz yerlilərinin arasından ancaq dost-tanışlarını meydana buraxır. Təbii ki, bu da nəticələrə təsir edir.

Komanda yaxşı çıxış etməyə bilər. “İmişli” kimi sonuncu yerdə də ola bilər. Onlara "gözünün üstündə qaşın var" deyən yoxdu. Klub rəhbərliyi açıq-aşkar deyir ki, sıfırdan formalaşmışıq, hələ bizim üçün iddialı olmaq tezdi. Bəs "daha peşəkar olacağıq" deyən sədr Rövşən Əhmədovun komandası niyə bu gündədi? Sabiq hakim və hakim-inspektor elə düşünürdü ki, klub idarə etmək oyun idarə etməkdi? Azər Həşimov zənn edirdi ki, baş məşqçi olandan sonra hər oyunda qələbə qazanacaq? Komandanı formalaşdırmaq ancaq klub rəhbərliyindən asılı olacaqsa, baş məşqçinin funksiyası nədən ibarətdi? Rövşən Əhmədovun “yuxarılar”a “ancaq mingəçevirli uşaqlarla oynayacağıq, daha az pul xərcləyəcəyik” sözünün acısını nə üçün azarkeşlər çəkməlidi? Halbuki həmin fanatlar öz pullarını xərcləyib səfərlərə gediblər. İdarə Heyəti olmayanda, komandanın çətin günlərində yanında olublar.

İki-üç gündü ki, azarkeşlər sosial şəbəkələrdə nəticələrə görə etiraz edirlər. Haqlıdılar! Vədlər verilibsə, yerinə yetirilməlidi. Görürsüz ki, bacarmırsız, elə yolun başlanğıcında işi başqalarına təhvil verib, getmək lazımdı.

İdarə Heyəti formalaşdırmaq və özünə sədr təyin etməklə klub saxlamaq olmur. “Mingəçevir”in sosial şəbəkələrdə fəallığı sıfıra bərabərdi. Heç olmasa, AFFA-nın ayırdığı maliyyənin cüzi hissəsini bu sahəyə ayırın, klubun media işlərini görmək üçün kimisə təyin edin. Yox, hansısa şəxslə işləmək istəmirsizsə, şirkətlərlə əməkdaşlıq edin. Bu da futbolçuları idarə etmək deyil ki, bacarmayasız...

İLKİN SULTANLI