"Hədəfimiz xal və xallar qazanmaqdı" - Vüqar Əsgərli
Misli premyer-liqasında 10-cu tura start verilib.
"Şamaxı" "Qəbələ"ni qəbul edib. 1:1 hesablı heç-heçə ilə bitən matçdan sonra meydan sahiblərinin çalışdırıcısı Vüqar Əsgərlinin mətbuat konfransı keçirilib. Sizi mütəxəssisin fikirləri ilə tanış edirik:
"Azarkeşlərimizə təşəkkür edirəm. Onları səbirli olmağa çalışıram. Sıfırdan formalaşmışıq və gənc futbolçularımız var. Oyunun gərgin keçəcəyini bilirdik. “Qəbələ”nin təcrübəli oyunçuları var, dinamik futbol oynayır. Onlara qarşı oynamaq çətindi. Ancaq sona qədər mübarizə apardıq. Əks-hücumda oynamaq istəyirdik. Bəzən alınırdı, bir neçə imkanımız oldu. Qol buraxsaq da, toparlana bildik. Hədəfimiz xal və xallar qazanmaqdı. Bu, hər şeyin yaxşı olması demək deyil. Üzərində işləyəcəyimiz çox şey var".
- “Qəbələ” kimi komandadan xal almaq əlavə motivasiya verəcək?
- Əlbəttə. Hər oyunda sona qədər mübarizə aparırıq. Sadəcə, son dəqiqələrdə qollar buraxırdıq. Bəxtsizlik bizdən əl çəkmir. Hər oyuna nizam-intizamla hazırlaşırıq. Ani diqqətsizlikdən qollar buraxırıq. Bu xal bizə motivasiya verəcək.
- AFFA 23 nömrəli futbolçu - Rövşən Şahmuradovun formasında adı yazılmadığı üçün klubu cərimələdi, amma bu gün yenə o, həmin formada meydana çıxmışdı...
“Şamaxı”nın mətbuat xidmətinin rəhbəri Yusif Hüseynov:
"Oyun başlayandan sonra cərimədən xəbərimiz oldu. Bizim səhvimizdi. Növbəti oyuna qədər aradan qaldırmağa çalışacağıq".
- Komandada gənclər var, amma səhvləri təcrübəli oyunçular edir...
- Qol buraxanda bütün komandanın səhvi olur. Təcrübəli futbolçular gənclərin inkişafı üçün çox vacibdi.
- Qışda heyətə legioner cəlb edilməsi müzakirə olunacaq?
- Rəhbərliklə belə görüşümüz olmayıb. Qış fasiləsi ərəfəsində danışıb, qərar verəcəyik. Biz də istərdik ki, legionerlər olsun. İstəyirik, belə davam edək. Qəti bir şey yoxdu. Rəhbərlik nə qərar versə, elə də olacaq.
Digər xəbərlər
