Micel Marselonun debüt etməməsinin səbəbini açıqladı
Əfsanəvi braziliyalı futbolçu Marselonun yeni komandası "Olimpiakos"da rəsmi debütü dünən "Atromitos"a qarşı keçirilən superliqanın 6-cı turunun oyununda (2:0) da baş tutmayıb.
"Football-plus.az" xəbər verir ki, 34 yaşlı ulduz matçın iştirak ərizəsində yer alsa da, sonadək ehtiyatda qalıb.
Bunun səbəbləri barədə danışan Pirey klubunun baş məşqçisi Micel oyundan sonra keçirilən mətbuat konfransında deyib ki, Marselo rəsmi matçlarda iştiraka yaxındır: "Amma o, komanda ilə cəmi 3 dəfə məşq edib. Biz onu qorumağa çalışdıq. Dünən mən onu ofisə dəvət edib söhbət apardım. O, qərarımı öyrənəndə qəzəbləndi. Çünki düşünürdü ki, artıq oyuna çıxacaq. O, ulduzdu, böyük klubdan gəlib. Amma qəlbinin dərinliyində öz işini çox yaxşı bilir".
Xatırladaq ki, Marselonun klubu olan "Olimpiakos" Avropa Liqasının qrup mərhələsində "Qarabağ"ın rəqibdir. Oktyabrın 6-da bu komandaların Pirey şəhərində öz aralarında ilk oyunu keçiriləcək. Cavab matçın oktyabrın 13-də Bakıda olacaq.
