"Qarabağ" "Nant" azarkeşlərinə görə problem yaşayıb
Ötən həftə Avropa Liqasının G qrupunun 2-ci turunda “Qarabağ” “Nant”ı darmadağın etdi.
Meydanda başverənlər hamıya bəllidi. Bizim diqqətimizi bir məqam çəkdi. Oyunu ümumilikdə 26495 azarkeş izlədi. Lakin bu, Çempionlar Liqasının təsnifat mərhələsindəki ev görüşləri ilə müqayisədə az idi. Səbəb nədi? Klub bu göstəricidən razı qalıb? Azarkeşlər oyuna niyə az gəlib?
Suallarımızı klubun mətbuat xidmətinin rəhbəri Gündüz Abbaszadəyə ünvanladıq: “Mən bu fikirlə razı deyiləm. Düşünmürəm ki, əvvəlki oyunlarla müqayisədə bu görüşə maraq az idi. Əksinə, maraq həmişəki kimi çox idi. Nəzərə alaq ki, görüşü 27 minə yaxın azarkeş izləyib. Digər tərəfdən, fransalı tərəfdarların oturduğu yerin yanındakı sektoru bloklamışdıq ki, məlum hadisələrin fonunda problem yaşanmasın. Bunu təhlükəsizliyə görə etmişdik. Bu da minə yaxın bilet edir. Ümumiyyətlə, onlar satışa çıxarılmayıb. Bütün bunları nəzərə alanda bu fikirlə razı deyiləm ki, maraq az idi. Əksinə, daha çox idi. Oyun günü “Qarabağ”ı dəstəkləyən, matça gələn, yanımızda olan, tarixi qələbəyə şahidlik edən hamıya təşəkkür edir, “çox sağ ol” deyirəm. İnşallah, növbəti oyunlarda görüşərik”.
İLKİN SULTANLI
Digər xəbərlər
