İlk matçda ''Verder'' üzərində 2:1 hesablı əzmkar qələbə qazanan "Beşiktaş" srağagün baş tutan ikinci görüşdə Plzen ''Viktoriya''sı ilə üz-üzə gəlib.

Football-plus.az xəbər verir ki, ''Kufştayn Arena''da keçirilən qarşılaşmada qapılara qol vurulmayıb. Valerien İsmael meydana bu ''11-liy''i buraxıb: Ərsin Destanoğlu, Nəcip Uysal, Velinton, Montero, Rozye, Salih Uçan, Fernandeş, Umut Meraş, Əmirhan Delibaş, Boyd, Cenk Tosun.

Fransalı mütəxəssis ikinci yarıda Kənan Karaman, Rıdvan Yılmaz, N'Kudu kimi oyunçularla yanaşı, Berkay Vardar, Əmrə Bilgin, Necati Bilgiç, Sisse, Oğuzhan Akgün kimi gənclərə də şans verib. O qədər də maraqlı keçməyən oyunu yaddaqalan edən isə Sərdar Saatçı olub. Gənc müdafiəçi 72-ci dəqiqədə Salih Uçanın yerinə meydana çıxdı. Sərdar qısa müddət ərzində bəzi mövqe səhvlərinə yol verdikdən sonra 84-cü dəqiqədə əvəzləndi! 19 yaşlı futbolçu bu qərarı çox emosional şəkildə qarşılayaraq birbaşa paltardəyişmə otağına yollandı. Üstəlik paltardəyişmə otağında da əsəbindən qapını təpiklədi. Bu olay qısa müddətdə sosial şəbəkələrdə yayılınca ''Beşiktaş'' oyundan bir neçə saat sonra yeni açıqlama verdi. Klubun rəsmi ''tvitter'' səhifəsinin paylaşımında qeyd olundu ki, Sərdar qeyri-müəyyən müddətə əsas komandadan kənarlaşdırılıb və Türkiyəyə qayıdaraq bazada məşqlərini fərdi şəkildə davam etdirəcək! Sonradan Sərdarın guya meydana 39 dərəcə qızdırma ilə çıxdığı iddia olundu. Amma futbolçunun atası bu iddianı təkzib etdi.

Yeni transferlərə gəlincə, Jedson Fernandeşlə Cenk Tosundan fərqli Vut Veqhorstla Cekson Muleka hələ də oyunlarda iştirak etmir. Çünki toplanışa yalnız ayın 9-dan qoşulublar. ''Beşiktaş'' növbəti yoxlama matçını sabah ''Maynts-05''ə qarşı keçirəcək. Bu oyunçulara həmin görüşdə şans verilə bilər. Digər yeni transfer Romeyn Saissin durumu isə ciddidi. Mərakeş yığmasının iyunun 13-də Liberiyaya qarşı keçirdiyi oyunda zədələnən 32 yaşlı müdafiəçi hələlik yalnız fərdi şəkildə məşq edir. Hətta onun ''Beşiktaş''ın ilk turda ''Kayserispor''a qarşı keçirəcəyi oyunda iştirakı da sual altındadı.