Dünən bundesliqanın 28-ci turu çərçivəsində oynanılan ''Frayburq'' - ''Bavariya'' matçında maraqlı olay yaşandı.

Münhen nəhəngi hesabda 3:1 öndə olarkən son anlarda baş məşqçi Yulian Naqelsmann ikili evezetməyə əl atdı. 85-ci dəqiqədə Kinqsli Komanı Marsel Zabitser, Korenten Tolissonu Niklas Zyule əvəzlədi. Amma 1 dəqiqə sonra hakim Kristian Dingert fitini səsləndirərək oyunu dayandırdı. Məlum oldu ki, Koman meydanı tərk etmədiyinə görə ''Bavariya'' 16 saniyə meydanda 12 futbolçu ilə oynadı! İlk baxışdan bu, qeyri-ciddi olay kimi görünsə də, buna görə ''Bavariya''ya texniki məğlubiyyət verilə bilər! Koman səhvini dərhal anlayaraq meydanın kənarına çıxdı. Hakimlər briqadası isə təxminən 5 dəqiqə məsləhətləşdikdən sonra oyun davam etdirildi. ''Bavariya'' qalan vaxtda daha bir top vuraraq inamlı qələbə qazandı. Əslində burda Komanın günahı yoxdu. ''Bavariya'' rəsmisi 4-cü hakimə səhvən ''29'' nömrənin əvəzlənməli olduğunu deyibmiş. Koman isə bu mövsümdən ''29'' yox, ''11'' nömrəli forma ilə çıxış edir. Ona görə də o, əvəzləndiyini anlamayıb. Hakim Dingert oyundan sonra verdiyi açıqlamada bu kiçik qalmaqalın protokolda qeyd edildiyini və yekun qərarın federasiya tərəfindən veriləcəyini dedi. Amma ''Frayburq''un çalışdırıcısı Kristian Ştrayx bu xırda epizoda görə federasiyaya etiraz etməyəcəklərini qeyd etdi.