''Marsel''in yeni baş məşqçisi İqor Tudorla türkiyəli vinger Cengiz Ündərin münasibətləri günü-gündən pozulur.

Ümumiyyətlə xorvatiyalı mütəxəssis yayda baş məşqçi vəzifəsinə gətirildiyi vaxtdan etibarən komanda daxilində çox pis ab-hava var. Futbolçular Tudorun ünsiyyət səviyyəsindən narazıdı. Fransa mətbuatında dəfələrlə bu haqda yazılar dərc olunub. Elə Tudorun Cengizi öz sisteminə uyğun futbolçu saymaması və onun satılmasını tələb etməsi barədə də çox şaiyələr gəzirdi. Liqa-1-də artıq 3 tur arxada qalıb və baş verənlər göstərir ki, həqiqətən də Cengizin işi bu məşqçi ilə çox çətin olacaq. ''Marsel''in ''Reyms''i 4:1 hesabı ilə yendiyi 1-ci turun qarşılaşmasında 25 yaşlı vinger 62-ci dəqiqədə əvəzləndisə, 2-ci turda ''Brest''lə səfərdəki 1:1-lik qarşılaşmada futbolçu fasilədə oyundan çıxmalı oldu. Dünən ''Marsel'' evdə ''Nant''I 2:1 hesabı ilə məğlub etdi. Bu mövsüm ilk dəfə ehtiyatda qalan Türkiyə yığmasının üzvü 65-ci dəqiqədə oyuna daxil oldu. Samuel Jiqonun qırmızı vərəqəsi alması ilə azlıqda qalmasına baxmayaraq ''Marsel'' 82-ci dəqiqədə qələbə qolunu vurmağa müvəffəq oldu. Qalan müddətdə hesabı qorumağa çalışan Tudor 83-cü dəqiqədə Cengizi oyundan çıxarıb xorvatiyalı mərkəz müdafiəçisi Çaleta-Tsarı meydana buraxdı. Cəmi 18 dəqiqə sonra əvəzlənməsi Cengizin o qədər xoşuna gəlmədi ki, o, birbaşa paltardəyişmə otağına yollandı! Ötən mövsüm ''Marsel''in ən yaxşılarından olan Ündər bu mövsüm 3 rəsmi oyunda cəmi 127 dəqiqə meydanda olub.