Artyom Dzyubanın meneceri Leonid Qoldman Rusiya saytlarından birinə maraqlı açıqlamalar verib.

"Football-plus.az" xəbr verir ki, tanınmış rusiyalı hücumçu bir müddət öncə ''Adana Dəmirspor''la ''1+1'' illik müqavilə imzalayıb. İllik qazancı 1,5 milyon avro olan 34 yaşlı forvard bazar ertəsi ''Fənərbaxça''ya qarşı debüt matçında qol vursa da, komandası 2:4 hesabı ilə mövsümdə ilk məğlubiyyətini yaşadı. Qoldmanı dinləyək: ''Artyomla birlikdə son təklifləri nəzərdən keçirərkən mənə birmənalı şəkildə dedi ki, futbol onun üçün puldan daha önəmlidi.

Dzyuba statuslu futbolçudu və onun göstəricilərinə baxmaq kifayətdi. Pul onun yeni transferində həlledici rol oynamadı. Özü də nəzərə alaq ki, Türkiyə koronavirus dönəmindən sonra bir qədər böhrandadı. Orda ''Zenit''lə eyni səviyyədə olan klubların Dzuybaya ''Zenit''dəki qazancı qədər pul təklif etməsini gözləmək gülməli olardı. Biz Səudiyyə Ərəbistanından çox sərfəli təklif almışdıq. Demək olar Dzyuba ora keçsəydi, ''Zenit''dəki qədər qazanacaqdı (söhbət illik təxminən 4 milyon dollardan gedir – Ə.R.). Amma Dzyuba ''ora getmək hələ tezdi'' deyərək təklifi geri çevirdi. ''Adana Dəmirspor''un ambisiyalı klub olması, eləcə də rəhbərliyin ona güvənməsi Artyomun diqqətini cəlb etdi. ''Srvena Zvezda''dan da zəng vurub maraqlananlar var idi. Amma Serbiya çempionatı Dzyubanı cəlb etmədi. O, daha güclü və rəqabətin yüksək olduğu çempionata can atırdı. Sona qədər gözlədikdən və hər şeyi yaxşıca götür-qoy etdikdən sonra yekun qərarımızı verdik. ''Tottenhem''in ötən il ona maraq göstərməsi haqda deyilənlər isə tam həqiqətdi. 2021-in yanvarında mən Yeni il tətilində olarkən Xorxe Mendeşə məxsus Portuqaliya agentliyindən zəng gəldi. Telefonda mənə dedilər ki, Keyn zədələndiyindən Mourinyo Dzyubanı ''Tottenhem''ə gətirmək istəyir. Artyoma bunu deyəndə əvvəlcə zarafat etdiyimi düşündü. Amma ona hər şeyin ciddi olduğunu başa saldım. Sadəcə, ''Zenit'' dərhal sərt mövqe tutaraq mövsümün ortasında liderini satmaq niyyətində olmadığını bildirdi. Ona görə də ''Tottenhem''in rəsmi təklif göndərməsinə ehtiyac qalmadı. Rusiyada hər nə qədər jurnalistlər bu olaya şübhəylə yanaşsalar da, olmuş hadisədi''.