Çempionlar Liqasının pley-off mərhələsində "Qarabağ" "Viktoriya" ilə qarşılaşıb.

Təmsilçimiz məğlub olub - 1:2. Oyundan sonra ağdamlıların baş məşqçisi Qurban Qurbanovun mətbuat konfransı keçirilib. Mütəxəssis oyun barədə fikirlərini bölüşüb və jurnalistlərin suallarını cavablandırıb:

- Şahruddin Məhəmmədəliyev və Abdullah Zubirin mövqeyində sanki, rəqabət yoxdu. Bu, Şahruddinin zəif oyununa təsir edə bilər?
- Biz istəyirik ki, komandamızda rəqabət çox olsun. Futbolçuların sayının çox olmağını istəyərdik ki, istədiyimiz proqram üzərində çalışa bilək. 3-4 gündən bir oyunlarımız olur. Həm ölkə çempionatında, həm avrokuboklarda bütün oyunlara hazır olmalıyıq. Zubirlə Şahruddin gəldikdə isə onların hər ikisinin bizim bu nəticələri göstərməyimizdə çox böyük zəhmətləri var. İkisinin də oyunundan razıyam. Sadəcə olaraq futbol səhvlər üzərində qurulub. Elə oyunlar olub ki, hamı "Şahruddin" qışqırıb. Bu gün də mən bunu hiss elədim. Sanki hansısa oyunçu vacib matçda səhv etdikdə o daha çox üzdə olur. Amma hər bir halda Şahruddinin oyunundan razıyam. Milli komandamızın qapıçısıdı. Belə oyunlarda onun təcrübəsi çox önəmlidi. Digər tərəfdən də mənim oyun üslubuma uyğun qapıçıdı. Əlbəttə ki, bizim digər qapıçılarımız var. Hətta gənc qapıçımız da var. Luka da gəncdi. Biz onların hər ikisini hazırlayırıq. Bu gün məğlubiyyəti kiminsə üstünə atmaq istəmərəm. İstəyirik ki, daha da yaxşı olaq. Daim transferlər etməyə çalışmışıq. Bəzi oyunçular var ki, danışıqlar aparmışıq, amma onları əldə edə bilməmişik. Ola bilər ki, qarşıdakı günlərdə razılıq əldə edək.

- Qapıçı da var maraqlandığınız oyunçuların içində?
- Xeyr, qapıçı yoxdu.

- Riçard Almeydanın zədələnməsi oyununuza necə təsir etdi?
- Bir az gözlənilməyən anda oyundan çıxdı. Topuğu burxuldu, bir az ağrısı var. Buna görə oyuna davam edə bilmədi. Riçard çox yaxşı oyun göstərdi. Oyuna nəzarət edə bilirdi. Bəlkə də məğlubiyyətdə bunun da rolu ola bilər. Amma meydana çıxan digər futbolçular da zəif oynamadılar.