Türkiyədə əvəzedicilərin çempionatında yaşanan bir hadisə ölkə futbol ictimaiyyətində geniş rezonans doğurub.

Dünən ''Qalatasaray'' 3-cü tur çərçivəsində səfərdə ''Ümraniyəspor'' üzərində 9:0 hesablı tarixi qələbə qazandı. Matçın əsas qəhrəmanı ötən mövsüm əsas komandada tez-tez görünən, amma Okan Burukun təyinatından sonra oynamaq şansı minimuma enən Barış Alpər Yılmaz oldu. Bu futbolçu oyunu 3 qol, 2 məhsuldar ötürmə ilə tamamladı. Amma ən çox müzakirə olunan hadisə heç də Alpərin performansı və ya yekun nəticə olmadı. Görüşə damğa vuran olay komandalar meydana ayaq basdığı məqamda orda inəklərin otlaması oldu! Futbol oynamaq üçün hazır vəziyyətə gətirilən stadionda iki inəyin olması sosial şəbəkələrdə müzakirələrə səbəb oldu. Qeyd edək ki, ''Qalatasaray'' əvəzedicilərin turnirində 3 oyuna topladığı 9 xalla liderdi.