“Qarabağ”ın sabiq futbolçuları 2016-ya qayıtdı - AÇIQLAMALAR
Sabah Çempionlar Liqasının pley-off mərhələsində doğma meydanda "Viktoriya" ilə qarşılaşacaq.
"Football-plus.az" xəbər verir ki, Qarabağ" 6 il əvvəl, daha dəqiq desək, avqustun 2-də Plzen təmsilçisiylə 3-cü təsnifat mərhələsində qarşılaşıb.
Həmin oyunda meydana çıxan 6 yerli futbolçu hazırda da karyerasını davam etdirir. Bədavi Hüseynov, Maksim Medvedev, Qara Qarayev və Riçard Almeyda hələ də "köhlən atlar"ın heyətində, Əfran İsmayılovla Elvin Yunuszadə isə "Kəpəz"də çıxış edir. Bunu nəzərə alaraq, 2016-da keçirilən görüşlərlə bağlı onları danışdırdıq. Daha doğrusu, hazırda “Kəpəz”in uğurları üçün çalışanları.
Əfran İsmayılov: "2016-cı ildə "Viktoriya"ya qarşı iki gərgin oyun keçirmişdik. Səfərdən sərfəli nəticəylə dönüb, evdə qələbəyə köklənmişdik. Meydanda dominantlıq edən də biz idik. Rəqibi öz qapısı önünə sıxmışdıq. Amma çoxlu qol vəziyyətindən yararlana bilmədik. Elə özüm 70-ci dəqiqədə qapıçıyla təkbətək çıxsam da, zərbəm toru yandan silkələdi. Bir dəqiqə sonra cinahdan reyd edib, iti bucaq altında qapıçı ilə təkbətək çıxıb, daha əlverişli mövqedə olan Miçelə ötürmə etsəm də, o, zərbə anını qaçırdı. Çox çalışdıq, amma 2-ci qolu vura bilmədik. Rəqib isə cəmi bir hücum etdi və fərqləndi. O zaman bəxtimiz gətirməmişdi. 6 il əvvəlki "Viktoriya" güclü idi, amma indi onlar daha da güclənib. Heç bir komanda Çempionlar Liqasının pley-offuna təsadüfən çıxmır. Odu ki, Çexiya təmsilçisini ciddi rəqib kimi qəbul etmək lazımdı. Hazırkı "Qarabağ" da güclüdü. Təmsilçimiz Polşa, İsveçrə, Macarıstan çempionlarını üstün oyunu ilə yolundan kənarlaşdırıbsa, deməli, "Viktoriya"ya qarşı da bunu edə bilər. "Köhlən atlar" Çexiya təmsilçisini yaxşı təhlil edib öz oyununu sərgiləsə, sevinən tərəf olacaq. Qurban müəllimə və "Qarabağ"a qarşıdakı matçlarda uğurlar arzulayıram".
Elvin Yunuszadə: "Ümumilikdə Çexiya klubları həmişə avrokuboklarda maraqlı mübarizə ilə diqqəti çəkib. "Slaviya", "Sparta", "Viktoriya" kimi komandalar müntəzəm avrokubokların qrup mərhələsində çıxış edir. 6 il əvvəl güclü "Viktoriya"ya qarşı oynadıq. Özü də Çexiya çempionundan daha yaxşı təsir bağışladıq. Sadəcə, matçın sonlarında ani diqqətsizlik, bəxtsizlik üzündən qapımızda qol gördük və mərhələni keçə bilmədik. Hazırda "Qarabağ" sərgilədiyi oyunla göstərir ki, keçilməyəcək rəqib yoxdu. "Viktoriya" nə qədər güclü olsa da, Ağdam təmsilçisi də onunla mübarizə aparıb, üstələyəcək qədər güclü və mübarizdi. İnanıram ki, "Qarabağ" 2016-cı ildəki uğursuzluğun təkrarlanmasına imkan verməyərək, Plzen təmsilçisini məğlub edib qrupa vəsiqəni təmin edəcək".
ABDULLA İSMAYILOĞLU
Digər xəbərlər
