Konfrans Liqasındakı oyunlar Azərbaycan klubları üçün uğursuz alındı. Bir gündə üç məğlubiyyətə fiasko da demək olar. Bəs son məğlubiyyətlər haqda Aslan Kərimov nə düşünür?
“İlk oyunu “Zirə” keçirdi. Komanda hələ qarşılaşmanın əvvəlində həyəcanlı görünürdü. Bunu əvvəl də demişdim, “Zirə” Konfrans Liqasına vəsiqə qazanmaqla bəlkə də bacardığından daha artığını edib. Oyunçuların fərdi keyfiyyəti və təcrübəsizliyi, ilk dəfə Avropa turnirində çıxış etmələri özünü göstərdi. Eyni zamanda, “Zirə” avrokuboklarda çıxış edən Azərbaycan komandalarından “Qarabağ” da daxil olmaqla ən güclü rəqibə qarşı oynayırdı. Görüşün ilk dəqiqələrindən rəqibin yüksək pressinqi görünürdü. Bu da onunla nəticələndi ki, futbolçular səhv etməyə başladılar. Rəqib də bundan yararlandı. “Zirə” pis oynadığına yox, müəyyən səhvlərə görə uduzdu. Bu da normal idi. Əslində komandanın düşünülmüş hücumları da oldu. Güclü rəqibə qarşı əlverişli imkanlar yaratdılar. Təxminən 3-4 qol epizodu oldu. Rəqib şanslarından təcrübəsi hesabına istifadə etdi. Amma təmsilçimizin oyunçuları təcrübəsizliyə görə epizodları dəyərləndirə bilmədi. Əlbəttə, cavab oyunu da çox ağır olacaq. Amma bu bir məktəbdi, futbolçularımız təcrübə yığır. Bəli, mərhələni keçmək inandırıcı görünmür. Düzdü, futbolda hər şey ola bilər, amma “Makkabi” cütün aşkar qalibi kimi görünür. “Qəbələ” isə məni əməlli-başlı təəccübləndirdi. İlk hissədə açıq futbol nümayiş etdirməsi, rəqibdən qorxmamasının nəticəsi idi ki, qol da vurdular. Yəni mən belə oyun gözləmirdim. Amma ikinci hissədə komandanın etdiyi səhvlər, yorğunluq, bundan sonra qırmızı vərəqənin olması “Qəbələ”nin qollar buraxmasını şərtləndirdi. Bəlkə də Elmar Baxşıyevin ehtiyatı çatmadı ki, ikinci yarıda dəyişikliklərlə komandanı toparlasın. Bu hesabdan sonra təmsilçimizin Qəbələdə işi çox çətin olacaq. Komandanın mərhələ keçəcəyi çətin görünür. “Neftçi” də məni təəccübləndirdi. Amma mənfi mənada. Təxminən son 15-20 dəqiqədə normal futbola oxşar bir şey gördük, hücum qurmağa çalışdılar. Amma ona qədər daha çox uzun ötürmələrlə oynayırdılar. Bilmirəm, bu məşqçinin göstərişi idi, yoxsa oyunçular hələ onun nə istədiyini bilmirlər. Səbəblər fərli ola bilər. Amma gözümüzün önündə olan odu ki, “Neftçi”də Samir Abasovun qoyduğu mirasdan, demək olar, əsər-əlamət qalmayıb. Ola bilər ki, bəzi oyunçular keyfiyyətlidi. Amma oyun baxımından o keyfiyyət görünmədi. Yenə deyirəm, komanda Samir Abasovun dövründə, çempionatın son matçlarında zəifləsə də, oyun üslubu görünürdü, keyfiyyət var idi. “Aris”lə qarşılaşmada isə onu görə bilmədik. Bəlkə də hələ tezdi. Amma təlim-məşq toplanışında yetərincə vaxtları olub. “Neftçi”nin bu mərhələni keçəcəyinə inanmağım gəlmir. Amma elə də böyük hesab deyil. Bəlkə də azarkeşlərin gücü, Bakının istisi ilə bu komandaya qalib gələ bilərlər. Lakin belə oyunla mərhələ keçəcəklərinə inanmıram”.