Tofiq Bəhramov adına Respublika stadionunun cənub qapısı azarkeşlərin üzünə bağlı idi. “Lex”lə qarşılaşmada isə həmin qapı yenidən açıldı. Bundan sonra azarkeşlər cənub qapısından rahat istifadə edə biləcək. Görəsən, qapı indiyə kimi niyə bağlı qalıb? Yenidən istifadəyə verilməsi kimin təşəbbüsü olub?
Bu suallara aydınlıq gətirmək üçün stadionun direktoru Şamil Quliyevlə danışdıq: "Cənub qapısı xeyli vaxt idi bağlıydı. Gənclər və idman naziri Fərid Qayıbov cənablarının göstərişiylə, azarkeşlərin rahat hərəkət etməsi üçün istifadəyə verildi. Bu məqsədlə qapıların yaxınlığındakı meydançalardan biri söküldü, əvəzində abadlaşdırma işləri aparıldı. Asfalt döşəndi, işıqlandırma sistemləri yeniləndi. Qısası, abadlaşdırma işlərinin stadiona heç ziyanı yoxdu. Əksinə, gözəllik, rahatlıq gətirdi. Bundan sonra azarkeşlərin stadiona giriş-çıxışı daha rahat olacaq".
ABDULLA İSMAYILOĞLU