"Bəhramov"da cənub qapıları da açıq olacaq! - Azarkeşlərə müjdə
Məlum olduğu kimi, ölkəmizi Çempionlar Liqasında təmsil edəcək “Qarabağ” 1-ci təsnifat mərhələsində “Lex”lə qarşılaşacaq.
İlk oyun iyulun 5-də səfərdə keçiriləcək. Cavab görüşü isə bir həftə sonra Bakıda, ənənəvi olaraq Tofiq Bəhramov adına Respublika stadionunda baş tutacaq.
Srağagün gənclər və idman naziri Fərid Qayıbov stadiona gedərək hazırlıq işləri ilə tanış olub. Maraqlıdı, onun təəssüratı necə olub? Stadionla bağlı hansı tapşırıqları verib? Bu haqda məlumat almaq üçün “Tofiq Bəhramov”un direktoru Şamil Quliyevlə əlaqə saxladıq: “Çempionlar Liqasının 1-ci təsnifat mərhələsinin cavab matçı burda baş tutacağına görə istəyirik ki, hər yüksək səviyyədə olsun. Əlbəttə, tamaşaçı sayının çox olacağı gözlənilir. Ona görə də onların stadiona girişi, təhlükəsizlik qaydalarına riayət olunması ilə bağlı müvafiq tapşırıqlar oldu. Gündəlik işlərimizi görürük. Nazirin işlərin daha da təkmilləşdirilməsi ilə bağlı göstərişləri oldu. Biz də onların hamısına riayət edirik. Hesab edirəm ki, oyun həmişə olduğu kimi yüksək səviyyədə keçəcək. Bundan əvvəlki matçlarda da nazir burda olub, tamaşaçı kimi izləyib və müsbət fikir bildirib. Biz də çalışırıq ki, ənənəni davam etdirək, hamı həmişəki kimi oyundan müsbət təəssüratla ayrılsın. Problemlər, adətən, ot örtüyü ilə bağlı olurdu. Bu dəfə isə ideal vəziyyətdədi. Güman edirəm ki, bu mövsümü də yüksək səviyyədə başa vura biləcək”.
Maraqlıdı, nazirin stadionda gedən işlərlə bağlı iradı olub? Şamil bəyi dinləyək: “Xeyr, heç bir irad bildirmədi. Sadəcə, müəyyən tapşırıqlar oldu. Bizdə oyunun başlamasına 2 saat qalmış qapılar açılır, tamaşaçılar içəri buraxılır. İzləyicilərin böyük bir qismi isə görüşün start götürməsinə yarım saat qalmış gəlir. Ona görə də girişdə sıxlıq yaranır. Bu da müəyyən narazılığa səbəb olur. Bu, bizim məsuliyyətimizi də artırır. Ona görə də bizə stadionun cənub tərəfdəki qapılarının açılması barədə göstəriş verildi. Bununla bağlı işlər aparılır. Həmin yerdə də biletlərin yoxlanılması üçün qurğular quraşdırılacaq. Başqa tədbirlərlə bağlı da müvafiq göstərişlər var ki, onların da hamısına əməl olunur. Deyə bilərəm ki, 3-4 günə stadion tam hazır olacaq. Bizim işimiz tamaşaçılara xidmət etməkdi. Çalışırıq ki, bunu ən yüksək səviyyədə həyata keçirək. Nazir tərəfindən verilən göstərişlər işimizi yüngülləşdirdi. Media olaraq sizin də köməyiniz lazımdı ki, insanlar maariflənsin, məlumatlı olsun. Ancaq əsas giriş yox, arxa tərəfdən, cənubdan da qapılar açıq olacaq. Yəni adamlar bölünsün ki, içəri rahat girmək mümkün olsun”.
ŞAİR ABDULLA
Digər xəbərlər
