Şamil Quliyev: “Ora yeni asfalt da çəkildi, işıq sistemi də yeniləndi” - AÇIQLAMA
Çempionlar Liqasındakı təmsilçimiz “Qarabağ” bu gün 1-ci təsnifat mərhələsində “Lex”lə qarşılaşacaq.
Cavab görüşü isə bir həftə sonra Bakıda, Tofiq Bəhramov adına Respublika stadionunda keçiriləcək. Gənclər və idman naziri Fərid Qayıbov bu görüşə hazırlıqla tanış olmaq üçün bir neçə gün öncə stadiona səfər baş çəkmişdi. Nazirin müəyyən tapşırıqlarından sonra arenanın cənub istiqamətdəki qapılarının da azarkeşlərin üzünə açılması qərara alındı. Bu da əsas girişin qarşısında yaranan sıxlığın qarşısını müəyyən qədər almaqla təhlükəsiz gediş-gəlişi təmin edəcək.
Maraqlıdı, bu yalnız “Qarabağ”ın Çempionlar Liqasındakı oyunları üçün nəzərdə tutulub? Arenanın cənub qapıları bundan sonrakı görüşlərdə də azarkeşlərin üzünə açıq olacaq? Bu haqda məlumat almaq üçün “Tofiq Bəhramov”un direktoru Şamil Quliyevlə əlaqə saxladıq:
“Sizin vasitənizlə hörmətli futbol azarkeşlərinin diqqətinə çatdırmaq istəyirəm ki, mövcüd imkanlardan səmərəli istifadə edərək stadiona giriş-çıxışla bağlı yeniliklər aparılır. Hazırda davam edən bəzi işlərdən sonra stadionun cənub qapılarının da açılmasına qərar verildi. Bu yalnız “Qarabağ”ın “Lex”lə oyununa aid deyil. Bundan sonrakı bütün, eyni zamanda premyer-liqa matçlarında da “Tofiq Bəhramov”un cənub qapıları azarkeşlərin üzünə açıq olacaq. Bildiyiniz kimi, bizdə sektorların sayı da çoxdu. 28 sektor var. Azarkeşlər aldıqları biletə uyğun cənub qapılarından stadiona daxil olandan sonra rahat şəkildə sektor istiqamətində hərəkət edə biləcəklər. Mənə elə gəlir ki, bu əsas qapıya axını yüngülləşdirəcək, orda yaranan sıxlığı aradan qaldıracaq və ən əsası da təhlükəsizliyə müsbət təsir göstərəcək. Azarkeşlərə bildirmək istəyirəm ki, stadionda baş verən bütün yenilikləri nəzərə alsınlar. Həm təhlükəsizliyə cavabdeh olan əməkdaşların, həm də öz işlərini yüngülləşdirsinlər”.
Bilindiyi kimi, “Tofiq Bəhramov”un cənub tərəfində bir neçə özəl meydança da var. Bu da həmin istiqamətdə azarkeşlərin arenaya daxil olmasına problem yaradacaqdı. Görəsən, bu məsələ necə həll olunub? Şamil bəyi eşidək:
“Orda 5 mini-meydança var. Biri də cənub qapısının qarşısını tuturdu. Qərar verdik ki, həmin stadion götürülsün, azarkeşlərin o istiqamətdə arenaya daxil olması üçün rahat şərait yaransın. Qeyd edim ki, ora yeni asfalt da çəkildi, işıq sistemi də yeniləndi. Başqa görülməli olan işləri da artıq yekunlaşdırmaq üzrəyik. Onu da bildirim ki, ərazidə 5 mini-meydança olduğuna görə onlardan birini ləğv etməyimiz orda keçirilən məşqlərə də problem yaratmayacaq. Qalan meydançalar məşqlər üçün hazır vəziyyətdədi”.
ŞAİR ABDULLA
Digər xəbərlər
