Avrokuboklarda iştirak edən klublar iştirak ərizəsini UEFA-ya nə vaxt göndərəcək?

Məlum olduğu kimi, ölkəmiz avrokuboklarda 4 klubla təmsil olunur.

Çempionlar Liqasında yarışan “Qarabağ” iki oyunun nəticəsinə görə “Lex”i üstələdi. Növbəti rəqib isə “Sürix”di. Konfrans Liqasında çıxış edəcək komandalarımızdan “Neftçi” “Aris”lə ilk oyunu iyulun 21-də, Bakı vaxtı ilə saat 21.30-da “AEK Arena”da keçirəcək. Cavab görüşü 28-i, saat 21.30-da “Bakcell Arena”da start götürəcək. “Zirə” isə “Makkabi”ylə iyulun 21-i, saat 20.00-da “Dalğa Arena”da qarşılaşacaq. Cavab görüşü bir həftə sonra Təl-Əvivdəki "Blumfild" stadionunda, saat 21.30-da başlayacaq. Mövsümü 4-cü yerdə bitirən “Qəbələ” də ilk görüşü rəqib meydanında keçirəcək. İyulun 21-i, saat 21.00-da başlayacaq oyunun revanşı bir həftə sonra, 20.00-da Qəbələ şəhər stadionunda baş tutacaq.

Maraqlıdı, komandalarımızın bu görüşlər üçün iştirak ərizəsi hazırdı? Sənəd nə vaxt UEFA-ya göndəriləcək? Bu suallara cavab almaq üçün klubların mətbuat katibləri ilə əlaqə saxladıq.

Gündüz Abbaszadə (Qarabağ): “İştirak ərizəsində heç bir dəyişiklik olmayacaq. Sənədi hələ göndərməmişik. Sabah (bu gün) saat 00.00-a kimi vaxtımız var. Ona görə də sabah göndərəcəyik”.

Rüstəm Allahverdiyev (Neftçi): “Əlbəttə, ərizə hazırdı. Vaxtımız olduğuna görə hələ göndərməmişik”.

Elmar Abdullazadə (Zirə): “Hələ ki göndərilməyib. Amma hazırdı və son müddətə kimi UEFA-ya təqdim olunacaq”.

Anar Hacıyev (Qəbələ): “Hələ ki göndərməmişik. Göndərən kimi məlumat veriləcək. İştirak ərizəsində kimlərin yer alacağı da açıqlanacaq”.

ŞAİR ABDULLA