“Qarabağ” Çempionlar Liqasının 1-ci təsnifat mərhələsində “Lex”ə səfərdə 0:1 hesabı ilə məğlub oldu.

Poznan klubunun qələbəsi Polşada sevinclə qarşılanıb. Bu ölkənin mediasında bununla bağlı fərqli yazılar, videolar paylaşılır.

Football-plus.az “TVP SPORT”un hazırladığı məqaləni təqdim edir:

Deyirsən: “Lex” qələbə qazanıb. Düşünürsən: Mikael İshak, yəqin ki, qol vurub. Ötən mövsüm Polşa çempionatının mənzərəsi belə idi. “Lex”in isveçli kapitanı avrokubokların kralı olduğunu sübut etdi. O, belə oyunlarda ən yaxşı snayperdi. “Lex” hücumçular baxımından şanslıdı. Robert Levandovski, Artyom Rudnev, Lukaş Teodorçik, Marçin Robak, Kristian Qutyer - onların hər biri mövsüm ərzində ikirəqəmli qol sayını keçib. Mikael İshak bu ənənəni davam etdirir, amma komandadakı rolu onu digər snayperlərdən fərqləndirir. İsveçli təkcə meydandakı oyunu ilə seçilmir. O, “Lex”in kapitanı və əsl lideridi. “Qarabağ”la oyundan sonra yenidən Poznanda bütün azarkeşlərin sevimlisinə çevrilib. Axı hücumçu həlledici qolu vurdu. Bununla belə, fərqlənməzdən əvvəl onun hansı işləri gördüyünə diqqət yetirməyə dəyər. Əvvəlcə o, mərkəzdə Joao Amarala topu göndərdi. Hərəkət edərək cərimə meydançasına irəliləyərkən isveçli topsuz rəqs etməyə başladı. Joelin ötürməsindən bir az əvvəl Pereyra onu bağlayan müdafiəçinin yanına doğru irəlilədi, amma bir neçə dəqiqə sonra ondan qaçdı. Maksim Medvedev bütün bunların içində azdı və bir az sonra qolun qarşısını ala bilmədi. Lakin İshakın işi təkcə hücumla məhdudlaşmırdı. İsveçli həm də ilk müdafiəçi idi. O, oyunu tez başlatmaq istəyən “Qarabağ”ın qapıçı və müdafiəçilərini narahat edirdi. Dəfələrlə öz cərimə meydançalarında da görünürdü. Düzdü, bir epizodda ciddi səhvə yol verdi. Qeyri-dəqiq daban ötürməsindən sonra İbrahima Vaci topu ələ keçirib, qapıya zərbə vurdu. “Lex”in bəxti gətirdi ki, hücum qolla yekunlaşmadı.

Hazırda Poznan təmsilçisində çoxlu səviyyəli oyunçu var. Llakin İshak indi şəhərin sevimlisidi. O, komandasının ölkə çempionu olmasına kömək etdi. İndi isə Çempionlar Liqasında uğur əldə etməyə çalışır. Azarkeşlər kapitanlarını Kərim Benzema ilə müqayisə edir və ona "İshak Papa" deyirlər. Hücumçu azarkeşlərin ona olan hisslərinin qarşılığını verir, fanatların komanda üçün nə qədər əlavə dəyər olduğunu hər addımda vurğulayır. İshak çərşənbə axşamı avrokuboklarda “Lex”in heyətində 9-cu qolunu vurdu. Biz bunu təsadüfən qeyd etmirik, çünki ona cəmi 11 oyun lazım idi ki, qeyd olunan nəticəni əldə etsin. “Kolejorz” 2020/21 mövsümündə Avropa Liqasının qrup mərhələsinə yüksələrkən isveçli beynəlxalq səviyyədə parladı. Təsnifat mərhələlərini də nəzərə alsaq, bu yarışın bombardiri oldu. Ola bilsin, “Qarabağ”a vurulan qol daha bir gözəl seriyanın başlanğıcıdı. Ötən mövsüm də isveçli şou göstərdi. Polşa ekstraklasasında keçirdiyi 31 matçda 16 dəfə fərqlənib. Onun qolları ləğv edilsəydi, “Lex” 7 xal az toplayardı. İsveçli çempionatda hər 4 zərbədən sonra qol vururdu. O, son dərəcə güclü forvarddı. Əlinə düşən şanslardan maksimum istifadə edir. “Qarabağ”la oyunda komanda birinci hissədə olduqca zəif təsir bağışladı. Lakin İshak əlinə düşən fürsətdən əla istifadə etdi. İndi baş məşqçi komandanın hücum qurmaq problemini həll etməlidi ki, İshak bu məqamlarda fərqlənə bilsin.

İLKİN SULTANLI