Polşa mətbuatı “Lex”in bugünkü oyun üçün heyətini müəyyənləşdirməyə çalışıb.

"Football-plus.az" xəbər verir ki, həmkarlarımız güman edir ki, start heyətində yeganə debütant ukraynalı qapıçı Artur Rudko olacaq. Müdafiədə Bartoş Salamon hələ bərpa dövrü keçdiyindən onun yerini slovakiyalı Lübomir Satka tutacaq. Qalan 3 mövqedə ötən mövsüm oynamış futbolçular – portuqaliyalı Joel Pereyra və Pedro Reboço, həmçinin xorvatiyalı Antonio Miliç çıxış edəcək. Sonuncu “Yagelloniya” ilə yoxlama matçında dubl etmişdi. Baş məşqçi Con van den Brom, yəqin ki, yeni transfer - portuqaliyalı Afonso Souzanı ilk dəqiqələrdən oynatmayacaq. Bu o deməkdi ki, ötən mövsümün bir çox oyunlarında olduğu kimi meydanının mərkəzində Radoslav Muravski isveçli Yasper Karlstremlə duet təşkil edəcək. Muravski start heyətində meydana çıxacağı gözlənilən 2 polşalı futbolçudan biridi.

“Lex”in ən böyük problemləri cinahlarla bağlıdı. Yakub Kaminski “Volfsburq”a transfer olundu, Damian Kondzior hələ də əsas heyətdə möhkəmlənə bilməyib. Georgi Sitaişvili komandaya yeni qoşulub, Kristofer Velde isə hələ də potensialını göstərə bilməyib. Belə qənaətə gəlmək olar ki, cinahların birində Adriel Ba Lua, digərində isə Mixal Krıstal oynayacaq. İsveçli forvard Mikael İshak, şübhəsiz ki, hücumun sivri ucunda yer alacaq. “Lex”in “Qarabağ”la oyun üçün gözlənilən heyəti aşağıdakı kimi olacaq:

Artur Rudko – Coel Pereyra, Lübomir Satka, Antonio Miliç, Pedro Reboço – Adriel Ba Lua, Yesper Karlstrem, Radoslav Muravski, Joao Amaral, Mixal Seleş – Mikael İshak.