Nəhayaət, Zlatan İbrahimoviçin məsələsinə aydınlıq gəlib.

Onun növbəti mövsümə də “Milan”da başlayacağı məlum olub.

İyunda dizindən əməliyyat olunan təcrübəli futbolçu hazırda bərpa dövrü keçir. Onun yaşıl meydana təxminən 6-7 aydan sonra dönəcəyi ehtimal olunur. Bu səbəbdən rəhbərlik İbrahimoviç ilə bu gün qüvvədən düşən müqavilənin müddətini yalnız 6 aylığa yeniləməyi lazım bilib. Uzun müddət top qovmaq imkanı olmayacaq 40 yaşlı isveçli hücumçuya aya 100 min avro maaş ödəniləcək. Zlatan karyerasını davam etdirə biləcəyi halda yanvarda müqavilənin müddəti 2022/23 mövsümünün sonuna qədər artırılacaq.

Yeri gəlmişkən, Alessandro Florentsi İtaliya paytaxtına qayıtmayacaq. “Milan” onu daimi əsasda sıralarında saxlayıb. Təcrübəli futbolçu son mövsümü icarə əsasında bu klubda keçirib və milanlıların İtaliya çempionu olmasında 24 oyunda iştirak və 2 qol vurmaqla rol oynayıb. Jurnalist Fabritsio Romano “Milan”ın onun transferinə görə “Roma”ya təxminən 3 milyon avro ödədiyini xəbər verib.