11 ildən sonra İtaliya çempionu olan “Milan” heyəti gücləndirmək üçün real addımlar atmaqdadı. Rəhbərlik həm də Zlatan İbrahimoviçin məsələsini yoluna qoymağa çalışır.

O, mövsümün sonunda növbəti dəfə zədə alaraq uzun müddətə - azı 4 aya qədər sıradan çıxsa da, karyerasını başa vurmaq niyyətində deyil. Yerli mənbələrin xəbərinə görə, Zlatan hazırkı klubunda oynamağa davam etmək istəyir. 40 yaşlı futbolçu bir neçə gündən sonra klubun rəhbərliyi ilə görüşəcək və gələcəyini müzakirə edəcək. Deyilənə görə, isveçli futbolçu komandada qalmaq üçün maaşının əhəmiyyətli dərəcədə azaldılmasına razıdı. Bu isə bossları qane etməyə bilməz. Xatırladaq ki, İbrahimoviçin “Milan”la müqaviləsinin müddəti bu ayın sonunda başa çatacaq.
Artıq rəhbərliyin Fikayo Tomori ilə yeni müqavilə üzrə apardığı danışıqlar sona çatmaq üzrədi. İnsayder Nikolo Skira tərəflərin artıq prinsipcə anlaşdığını xəbər verib. Müdafiəçinin mövcud anlaşmasının müddəti 2025-ci ilin yayına qədər nəzərdə tutulub. Klub 24 yaşlı Tomorinin illik maaşını 3,5 milyon avroya qaldırmağı lazım bilib.

İtaliyanın yeni çempionu “Liverpul”un hücumçusu Divok Orici ilə müqavilə bağlamağa yaxındı. Yerli mətbuatın məlumatına görə, rəhbərlik artıq onunla danışıqları yekunlaşdırıb. Tezliklə 27 yaşlı forvardla 3 illik müqavilə imzalanacaq. Belçikalı futbolçunun illik maaşı 3,5 milyon avro olacaq. Orici artıq “Liverpul”dan azad agent kimi ayrılıb. O, bu komandada 2014-cü ildən çıxış edirdi. Divokun qırmızı formada 175 oyun keçirib 41 qol vurduğunu və 18 məhsuldar ötürmə etdiyi də xatırladaq.

“Milan”ın çoxdan hədəfə aldığı Renato Sanşeş ilə prinsipial razılığa gəldiyi də məlum olub. İtaliya klubu hazırda “Lill” rəhbərliyi ilə danışıq aparır.
“Milan” həmçinin “Roma”dan Alessandro Florentsini də almağa çalışır. Lombardiyalılar qarşı tərəflə müntəzəm danışıqlar aparırlar.