Nə Federer olacaq, nə də Venus
Dünya tennis ictimaiyyəti iyunun 27-də start götürəcək “Uimbldon”un həyəcanı ilə yaşayır.
Dizindəki əməliyyatdan sonra bərpa prosesi keçən Rocer Federer turniri buraxacaq. 40 yaşlı isveçrəli ötən il “Uimbldon”un 1/4 finalında polşalı Hubert Hurkaça uduzmuşdu (3:6, 6:7 (4:7), 0:6). İyunun 17-də 42 yaşını tamamlayan Vinus Uilyams da bu turnirdə çıxış edə bilməyəcək. Xatırladaq ki, o, bu turnirin beşqat qalibidi. 1996-cı ildən bəri ilk dəfə “Uimbldon”da nə Federer olacaq, nə də Vinus Uilyams.
Rafael Nadal isə London turnirinə həvəslə hazırlaşır. “Rolan Qarros”da xroniki daban ağrısından əziyyət çəkən, bununla belə, qələbəni bayran edən 36 yaşlı ispaniyalı azarkeşlərinə mesaj göndərib:
“Niyyətim “Uimbldon”da çıxış etməkdi. İki müalicə seansı arxada qaldı, onlar uğurlu oldu. Son beş gün ərzində yaxşıca məşq edə bildim. Son 3 ildə ot üzərində oynamadığımdan bir qədər səbirli olmalıyam. Hər gün özümü bir qədər daha yaxşı hiss edirəm. Londonda hələ bir həftə də məşqlər olacaq. Ümid edirəm ki, bunun sayəsində “Uimbldon”da rəqabədavamlı tennis göstərəcəm”.
