Nadalın əmisi onun “Uimbldon”da oynayacağını dedi
İspaniyalı tennis ulduzu Rafael Nadalın əmisi Toni onun “Uimbldon”da çıxış edəcəyini bildirib.
Tennis.net saytı onun aşağıdakı fikirlərinə yer verib: “Rafael “Uimbldon”da oynayacaq. Anladığım qədəri ilə Rafanın zədəsinin uzunmüddətli fəsadları olmayacaq, ancaq indi bu zədəyə görə oynaması çətindi. Əməliyyat etdirmək variantı da var. Ancaq belədə onun bir daha əvvəlki kimi yüksək səviyyədə oynaması çətin olacaq. Bu üzdən Rafa indi əməliyyat olunmaq istəmir. “Rolan Qarros”dakı qələbədən sonra Rafa ilə danışdım, mənə dediyi ilk söz bu oldu ki, “hələ də ağrıyıram”. Amma dünən təkrar əlaqə saxladıqda cavab verdi ki, özümü yetərincə yaxşı hiss edirəm. O, məşq etmək istəyir. Rafanın hətta ən kiçik şansı da olsa, “Uimbldon”da oynayacaq. O, bazar ertəsi korta çıxmağı planlaşdırır”.
