“Neftçi”də qeyri-müəyyənlik davam edir.


Flaqmanın Konfrans Liqasındakı rəqibi bəlli olsa da, baş məşqçi məsələsi hələ də açıq qalıb. “Ağ-qaralar” adı çəkilən turnirdə Cənubi Kipr “Aris”i ilə üz-üzə gələcək. Limassol təmsilçisindən fərqli “Neftçi”nin düşərgəsindən püşklə bağlı mediaya açıqlama verilməyib. Təbii ki, səbəb baş məşqçinin adının hələ də açıqlanmamasıdı.

İyunun 14-də Müşahidə Şurasının iclası gözlənilirdi. Lakin bu toplantı baş tutmadı. Keçirilməməsinin səbəbi isə bəlli deyil. Mediada yayılan xəbərlərə görə, “Neftçi” türkiyəli məşqçi Ərtoğrul Sağlama tapşırılacaq. Təcrübəli mütəxəssis son iş yeri olan “Traxtor”dan ayrılıb. Bununla bağlı o, şəxsi “instaqram” hesabında paylaşım edib. Türkiyəli məşqçi Cənubi Azərbaycan təmsilçisinin rəhbərliyi ilə razılaşmadığını bildirib. Bəzi mənbələr iddia edir ki, 52 yaşlı çalışdırıcı artıq Bakıdadı. Onun tezliklə flaqmanla rəsmi müqavilə bağlayacağı da qeyd olunur.

Görəsən, bu xəbərlər həqiqəti əks etdirir? Sualımızı “Neftçi”nin Media, Marketinq və İctimaiyyətlə Əlaqələr Departamentinin rəhbəri Rüstəm Allahverdiyevə ünvanladıq: “Baş məşqçi məsələsi ilə bağlı konkret heç nə yoxdu. Olan kimi rəsmən ictimaiyyətə açıqlama verəcəyik. Ərtoğrul Sağlamın Bakıya gəldiyi haqda xəbərlər həqiqəti əks etdirmir. Onunla paytaxtımızda görüş olmayıb. Təbii ki, məşqçi ilə danışıq baş tutub. Amma bu görüş Bakıda olmayıb. Hər iki tərəf şərtlərini deyib. Amma hələ ki son qərar verilməyib”.

Gördüyünüz kimi, klub rəsmisi yazılanları təkzib edir. Lakin redaksiyamıza “Neftçi” ilə bağlı maraqlı məlumat daxil olub. Belə ki, komanda dünən təlim-məşq toplanışı üçün bir araya gəlib. Tibbi baxışdan keçən oyunçular artıq məşqlərə başlayıb. Milli komandanın düşərgəsində olanlar isə iyunun 25-nə kimi heyətə qoşulacaq. Onlara tapşırıqları yeni məşqçi verəcək. Bu məhz Ərtoğrul Sağlam olacaq. 52 yaşlı mütəxəssisin yaxın günlərdə təqdimatı olacaq.

İLKİN SULTANLI