Geridə qalan mövsüm Region Liqasında “Cəbrayıl”ı çempionluğa daşıyan Cavid Hüseynovun yeni iş yeri məlum olub.

Etibarlı mənbədən "Football-plus.az"a daxil olan məlumata görə, B kateqoriyalı mütəxəssis növbəti mövsümdən “Neftçi”nin U-19 komandasını çalışdıracaq. Bu və bizi maraqlandıran başqa suallara cavab tapmaq üçün Hüseynovla söhbətləşməyi lazım bildik.

- Yeni işin xeyirli olsun.

- Hansı işim?

- “Neftçi”yə təyinatını nəzərdə tuturam. Əldə etdiymiz məlumata görə, növbəti mövsümdən “ağ-qaralar”ın U-19 komandasını çalışdıracaqsan.

- Dəqiq söhbət deyil. Mətbuat belə yazır.

- Hər halda, od olmayan yerdən tüstü çıxmaz...

- Belə deyək, “tüstü” var (gülür), ancaq təsdiqini tapmalıdı. Özün də bilirsən ki, belə məsələlərə Müşahidə Şurası qərar verir.

- Məncə, Müşahidə Şurasının üzvləri Cavid Hüseynovun “Neftçi”də çalışmasına etiraz etməz.

- İnşallah. Görək necə olur.

- “Neftçi”də çalışacağın halda “Cəbrayıl”ın aqibəti necə olacaq? Komandanı gələn ay UEFA Region Liqası çərçivəsində Belarus təmsilçisi ilə önəmli qarşılaşma gözləyir.

- Hazırda həmin oyuna hazırlaşırıq. Məncə, burda problem yaşanmayacaq. Həmin oyunlardan sonra komandanı təhvil verəcəm. Daha dəqiq desəm, rəhbər kimi qalacam. Sadəcə, baş məşqçi postuna başqa mütəxəssis dəvət olunacaq.

- Sirr deyilsə, “sükan”ı kimə təhvil vermək fikrin var?

- Bu sual açıq qalıb. Hələ heç nə bilinmir. Ancaq iş bacaran, özümüzün də yaxından tanıdığımız bir məşqçi olacaq.

- “Cəbrayıl”ın divizionda iştirakına icazə verilsəydi, “Neftçi”nin təklifini qəbul edərdin?

- Komanda aşağı dəstədə çıxış etsəydi, heç yerə getməzdim. Bir də komandanın birinci divizionda necə olacağından çox şey asılı idi. Biz hər məsələyə peşakar kimi yanaşırdıq. Açğı, bu gün üçün aşağı dəstədə vəziyyət o qədər də ürəkaçan deyil. Divizion komandalarının bəzilərinin işə yanaşması acınacaqlıdı. “Cəbrayıl”ın aşağı dəstədə çıxışına icazə verilsəydi, həm klubun, həm də futbolçuların inkişafı üçün böyük işlər görməyi planlaşdırmışdıq.

- Məndə olan məlumata görə, sənə başqa klublardan da iş təklifi gəlib. Bildiyim qədər “Sumqayıt” da məşqçi kimi xidmətində maraqlı olub.

- Bəli, “Sumqayıt” rəhbərliyindən də iş təklifi almışam. Bu barədə danışığımız olub. İndi elə mərhələdi ki, işlə bağlı görüşlər keçirilir, müzakirələr aparılır.Mənə xoşdu ki, həm “Sumqayıt”, həm də “Neftçi” maraqlanır, iş təklifi göndərir. Əsas odu ki, işləmək istəyirəm və mənə də bu şəraiti yaratmaq istəyən klublar var. Məşqçi kimi inkişaf etmək, uğurlar qazanmaq istəyirəm.

- “Cəbrayıl”ın hazırlığı necə gedir?

- Çox istərdik ki, çempion olduğumuz kollektivlə UEFA Region Liqasında da yolumuza davam edək. Əlavə 4-5 futbolçu da dəvət edib, yaxşı komanda qurmaq olardı. Təəssüf ki, istəyimiz baş tutmadı. Komandanın 95 faizini dəyişmək məcburiyyətində qaldıq. UEFA-nın reqlamentinə görə keçmişdə peşəkar müqaviləsi olan heç bir futbolçu bu turnirdə çıxış edə bilməz. Hətta əvəzedici heyətlə müqaviləsi olanlara da icazə verilmir. Belə olan halda yenidən komanda formalaşdırmalıyıq. Açığını deyim, çox çətin prosesdi. Qısa vaxtda yeni kollektiv qurmaq çox çətindi. Buna baxmayaraq, ortaya iş qoymağa çalışırıq. Bunu nə qədər bacaracağımızı zaman göstərəcək. Hər halda, azarkeşlər bizi başa düşər. Təxminən 25 gündən sonra meydana çıxmalıyıq. Bu günə kimi yeni kollektivlə cəmi üç məşqə çıxmışıq. Çalışacağıq ki, əlimizdən gələnin ən yaxşısını edək.

- Məşqlərə Bakıda başlamısız, yoxsa Şamaxıda?

- Hələ ki Bakıda məşq edirik. İyunun 12-dən etibarən isə hazırlıq Şamaxıda davam edəcək.

RƏŞAD