“Neftçi"də baş məşqçi elə biri olmalıdı ki, futbolçularla dil tapa, çətin anlarda komandanı toparlaya bilsin”
Təxminən bir aydan sonra klublarımız avrokuboklarda ilk oyunlarını keçirəcək.
"Football-plus.az" xəbər verir ki, qitəmiqyaslı turnirə yollanacaq 4 təmsilçimizdən üçü hazırlıq planını tərtib edib, transfer çalışmalarına başlasa da, “Neftçi”də bu yöndə səssizlikdi. Bu da ondan qaynaqlanır ki, hələ də “ağ-qaralar”ın yeni baş məşqçisinin adı müəyyənləşməyib.
Paytaxt təmsilçisinin Müşçahidə Şurasının üzvü, veteran futbolçu Səməd Qurbanov bizimlə söhbətdə hazırkı duruma belə münasibət bildirdi: “Baş məşqçi məsələsi ilə bağlı məndə heç bir məlumat yoxdu. Deyiblər ki, iyunun 8-də Müşahidə Şurasının iclası olacaq. Ancaq hələ bir xəbər yoxdu. Komandanı əcnəbi, yoxsa yerli məşqçi çalışdırsın? Fikrimcə, kimliyindən asılı olmayaraq, baş məşqçi elə biri olmalıdı ki, futbolçularla dil tapa, çətin anlarda komandanı toparlaya bilsin. Əsl komanda formalaşdırmağı bacarmalıdı ki, gələcəkdə xoşagəlməz söz-söhbət ortaya çıxmasın. Baş məşqçi elə bir mütəxəssis olmalıdı ki, “Neftçi”nin adını yüksələrə daşısın, hansı klubda çalışdığının mahiyyətinə varsın. Baş məşqçi üçün ən vacib şərtlərdən biri də ünsiyyət qurmaq bacarığının olmasıdı. Nə qədər güclü mütəxəssis olursan-ol, futbolçularla dil tapa bilməyəcəksənsə, uğur qazanmağın qeyri-mümkündü”.
Adı “ağ-qaralar”la yanaşı hallanan əcnəbi mütəxəssislərin rəhbərlik qarşısında irəli sürdüyü maliyyə şərtləri çox yüksəkdi. Həmin vəsaiti yerli məşqçiyə vermək, eyni şəraiti onun üçün də yaratmaq olmazmı? Səməd bəyin məsələyə reaksiyası belə oldu:
“Mən də mətbuatda əcnəbi məşqçilərin hansı şərtləri irəli sürdüklərini oxumuşam. Onlar sözlərini kimə və harda deyib - bilmirəm. Bəlkə də heç belə söhbət olmayıb, sadəcə, mediaya kimsə bilərəkdən belə məlumat ötürüb. Bu tələbləri yalnız o halda irəli sürmək olar ki, namizədliyin təsdiqlənsin, komandanın “sükan”ı sənə tapşırılsın. Hər halda, necə olacğını böyük ehtimalla iyunun 8-də biləcəyik”.
RƏŞAD
Digər xəbərlər
