“Turan Tovuz”un baş məşqçisinin adına sabah aydınlıq gəlməyəcək - ÖZƏL AÇIQLAMA
Bir neçə gün öncə “Turan Tovuz”un Müşahidə Şurasının sədri Oqtay Abdullayevə istinadən “boz qurdlar”ın baş məşqçi postuna 4 namizdin olduğunu xəbər vermişdik.
Söhbət Ayxan Abbasov, Ramin Quliyev, Əsgər Abdullayev və Yunis Hüseynovdan gedir.
Oqtay bəy “Football-plus.az” saytına açıqlamasında Müşahidə Şurasının toplantısında namizədliyi irəli sürülən mütəxəssislərlə bağlı müzakirələr aparılacağını və yalnız bundan sonra növbəti mövsümdə elitada çıxış edəcək komandanı kimin çalışdırcağına aydınlıq gələcəyini söyləmişdi. Ancaq dünən mətbuatda Yunis Hüseynovun artıq qərblilərə baş məşqçi təyin olunduğu ilə bağlı xəbərlər yayıldı ki, bu da çoxlarını təəccübləndirdi. Məsələ burasındadı ki, Hüseynov özü də açıqlamasında bu xəbəri təsdiqləyib.
Məsələyə aydınlıq gətirmək üçün bu gün yenidən “Turan Tovuz”un Müşahidə Şurasının sədri ilə danışmağı lazım bildik. Abdullayev yayılan söz-söhbətə belə reaksiya verdi:
“Ötən dəfə sizə baş məşqçi postuna 4 namzədin olduğunu demişəm. Onu da bildirmişəm ki, komandanı kimin çalışdıracağına Müşçahidə Şurasının iclasından sonra aydınlıq gələcək. Yunis Hüseynovun artıq “Turan Tovuz”un baş məşqçisi təyin olunması məsələsinə gəlincə, bilmirəm, bu söz-söhbət hardan çıxıb. Müşahidə Şurasının qərarı olmadan kiminsə özünü baş məşqçi təyin etməsi absurddu. Bu ən azı digər namizədlərə hörmətsizlikdi. Namizədlərin hər biri komandanı çalışdırmağa layiqdi. 7 ildi klubun Müşahidə Şurasının sədriyəm. Bu günə kimi heç vaxt təkbaşına qərar qəbul etməmişəm. “Turan Tovuz”da bütün məsələlər qarşılıqlı razılıq əsasında həll olunur. Klubda tam şəffaf mühit var”.
Oqtay bəy Hüseynovun açıqlamasına da münasibət bildirdi:
“Yunis Hüsynovu hamımız çox yaxşı tanıyırıq. Güclü futbolçu olub, məşqçi kimi də çalışdığı klublarda iz qoymağı bacarıb. İnanmıram ki, mətbuata belə açıqlama versin. Ola bilsin, anlaşılmazlıq olub. Bir daha deyirəm, baş məşqçi məsələsinə klubun mayın 17-də keçiriləcək Müşahidə Şurasının iclasında aydınlıq gələcək. Düzdü, ötən dəfə sizə iclasın ayın 13-də keçiriləcəyini demişdim. Ancaq bəzi məsələlər var ki, ona görə toplantının vaxtı uzandı”.
RƏŞAD
Digər xəbərlər
