Azərbaycan millisinin baş məşqçisi Canni De Byazi Millətlər Liqasında Belarusa qarşı keçiriləcək matçdan öncə mətbuat konfransında iştirak edib.

“Football-plus.az” saytının məlumatına görə, italiyalı mütəxəssis oyunöncəsi mətbuat konfransında bunları deyib:

"Belarusla oyuna hazırıq. Ola bilər ki, Belarus Qazaxıstandan daha güclü komandadır. Buna uyğun hazırlıq görürük. Futbolda ən vacib olan nəticədir. Qazaxıstanla görüşdə qol imkanlarımız oldu, topla yaxşı rəftar etdik. Amma bu şansları dəyərləndirə bilmirsənsə, qalib gələ bilmərsən. Təəssüf ki, biz də məğlub olduq. Rəqibin cəmi 2 zərbəsi oldu, hər iki halda top qapıdan keçdi. Bizim isə 15 zərbəmiz var idi”.

De Byazi rəqibin standart vəziyyətlərdə təhlükəli olduğunu bildirib:

"Üç mərkəz müdafiəçi ilə oynayırlar. Çox fantaziyası olmayan komandadı. Təxminən bizimlə eyni səviyyədədirlər. Boyları uzundur, standart vəziyyətdən təhlükəli ola bilərlər. Amma onların oynaması bizdən asılı olacaq. İstəməsək, oynaya bilməzlər. Necə ki, Qazaxıstana ilk hissədə oynamaq imkanı verməmişdik. Xarakterli olmalıyıq. Bilirəm ki, komandamızın yaxşı keyfiyyətləri var”.

İtaliyalı mütəxəssis Belarusa qarşı keçiriləcək oyunun start heyətini hələ ki, müəyyənləşdirmədiyini deyib:

“Heyətlə bağlı dəqiq qərar verməmişəm. Bu gün kimin özünü fiziki cəhətdən necə hiss etdiyinə baxacağıq. Uzun yol qət etmişik. Kimsə daha tez bərpa olur, kimdəsə bu alınmır. Çalışacağıq balansı itirməyək və matçda yaratdığımız imkanlarından düzgün yararlanaq”.