“İlk hissədə çoxlu imkanlarımız oldu, qol vəziyyətləri yaratdıq. 4-5 qol şansından yararlanmalı idik".

"Football-plus.az" xəbər verir ki, bu sözləri Azərbaycan millisinin baş məşqçisi Canni de Byazi Qazaxıstana 0:2 hesabı ilə uduzduqları Millətlər Liqasının qrup mərhələsinin 1-ci tur oyunundan sonra mətbuat konfransında deyib.

66 yaşlı mütəxəssis birinci hissədə yaxşı oyun sərgilədiklərini bildirib:

"İkinci yarının əvvəlində kuryoz qol buraxdıq. Ondan sonra diqqətsizlik etdik, ikinci qolu qapımızda gördük. Belə təcrübəli oyunçuların bu cür səhvləri yaxşı hal deyil. Hesab 0:2 olduqdan sonra da oyunu dəyişə bilmədik”.

De Byazi heyət seçimində yanılmadığını düşünür:

“Adətən uduzanda səhv məşqçinin olur. Bu gün ilk “11-lik” oyuna çox yaxşı başladı. Təəssüf ki, hücumları məntiqi sonluqla yekunlaşdırmağı bacarmadıq. Öz imkanlarından yararlana bilmirsənsə, bu, sonradan sənə problem yaradır. Qələbə qazanmaq istəyirsənsə, ələ düşən imkanları dəyərləndirməlisən. Həmçinin şans amili də öz rolunu oynadı. Heç nədən kuryoz qol buraxdıq və bu, komandanı meydanda əsəbiləşdirdi. Çox keçmədən də ikinci topu buraxdıq”.

O, iyunun 6-da Belarusla keçiriləcək matçda heyətdə rotasiya edib-etməyəcəyi ilə bağlı sualı isə belə cavablandırıb:

“İndidən nəsə deyə bilmərəm. Bundan sonra 5 saat yarım uçacağıq. Sabah səhər oyanandan sonra heyətdə rotasiya edib-etməyəcəyimizə baxacağıq”.

De Byazinin qazax jurnalistlərlə sual-cavabını da təqdim edirik.

- Komandanızın aşağı məhsuldarlığı nə ilə bağlıdı?
- Mən də özümə bu sualı verirəm. İmkanlarımız çoxdu, ancaq onları qola çevirməklə bağlı problem var.

- Qazaxıstan yığmasının heyətindən kimi qeyd edərdiz?
- Mən yalnız öz oyunçularıma baxdım. Öz məşqçinizdən soruşun.

- ÇL-in finalındakı “Real” kimi Qazaxıstan da cəmi bir neçə təhlükəli vəziyyət yaratdı, ancaq onları reallaşdırdı və qələbə qazandı.
- “Real” yalnız Çempionlar Liqasını yox, başqa titullar da qazanır. Bu komandanı sizin səviyyənizlə müqayisə etmək düzgün deyil. Demək olar ki, uzaq məsafədən vurulan qolda bəxtiniz gətiedi, üstəlik top da çəkdi. Bu məqam oyunu çox dəyişdi.

- Komandanız ikinci hissədə birinci ilə müqayisədə pis göründü. Bu nə ilə bağlıdı?
- Düşünürəm ki, komanda ilk qoldan sonra əsəbləşməyə başladı. O qola düzgün reaksiya verə bilmədilər, ardından ikincini də buraxdılar. Siz bu qələbəyə sevinməlisiz. İlk yarıda dəfələrlə artıq qol vəziyyəti yaratdıq, sizdə isə heç nə, müdafiədən çıxmaq alınmadı, cəmi iki künc zərbəsi qazandız.