Beləliklə, mayın 31-də ölkə futbolu ilə bağlı növbəti komediyanın iştirakçısına çevrildik.

Əlbəttə, baş rolda başqalarıdı, yəni AFFA İcraiyyə Komitəsinin üzvləri, futbol ictimaiyyətinin qalan təbəqələri seyrçi rolundadı. Aprelin 29-da ölkə çempionatında legioner limiti olduğu kimi (6+5) saxlanılmışdısa, bir ay sonra qurum məsələyə yenidən baxdı və mövqeyini dəyişdi. Yəni bundan sonra çempionat oyunlarında 7 əcnəbi ustalığını göstərməyə, 4 yerli futbolçu da onlara baxıb, nəsə öyrənməyə çalışacaq. Demək olar, yüzdəyüz əminəm ki, dünyanın heç bir başqa ölkəsində bir ay içində iki dəfə legioner limiti müzakirə olunmayıb və hər dəfə də fərqli qərar verilməyb. Qoy olsun, bu əcaib məqamın üzərindən sükutla keçib, mahiyyətə varaq.

Hər şeyin məhz təzyiqin nəticəsi olduğunu güman edirdik, amma baş katib Sərxan Hacıyev sağ olsun, “xüsusən avrokuboklara qatılacaq klubların təkliflərinə baxdıq” deməklə məsələyə aydınlıq gətirdi. AFFA aprelin 29-da limiti saxlayandan sonra bu yay avrokuboklara komanda çıxaracaq 4 baş məşqçidən üçü – Qurban Qurbanov, Rəşad Sadıqov və Samir Abasov narazılığını gizlətmədi. Onlar yerli oyunçularla rəqabətədavamlı komanda yaratmağın mümkünsüzlüyü hər addımda önə çəkirlər. Srağünkü qərar yığma maraqlarının birmənalı şəkildə klub maraqlarına qurban verilməsidi. Narazıların iddiasına inansaq, “4-lüy”ə, premyer-liqada 10 klubun yarışacağını nəzərə alsaq, “40-lığ”a düşmək uğrunda yerli futbolçular arasında rəqabət artacaq və bu da onların inkişafına gətirib çıxaracaq. Eyni zamanda qitə kuboklarında legioner limitinin olmaması Azərbaycan klublarının 7+4 sistemində daha güclü heyət qurmasını şərtləndirəcək. Sadəcə, Sərxan bəyin “rəqabətədavamlı klubların çoxalması çempionatımızın inkişafına və gücləndirilməsinə gətirib çıxaracaq, bu da milli komandanın müsbət nəticə göstərməsindən yan keçə bilməz” kimi fikirləri arasında heç bir səbəb-nəticə əlaqələri tapa bilmədim ki, tapan varsa, mənə də desin.

“Milliləşdirilən” oyunçuları bir kənara qoyaq. İndi belə çıxır ki, ölkəmizin əsas və U-21 yığmaları məhz həmin 40 futbolçu əsasında formalaşmalıdı. Lap “Kəpəz”lə “Turan”ın əsasən yerlilərə güvənəcəyini də hesablayıb, bu rəqəmi 50-yə çatdıraq. Heç biri öz klublarında əsas rollarda olmayan 5 legioneri də siyahıya əlavə edəndə De Byazi ilə Obradoviçin 55 futbolçunun ümidinə qaldığını görmək çətin deyil. 55 futbolçu əsasında iki güclü komanda formalaşmalı və bunlardan biri Millətlər Liqasında – Slovakiyanın da yer aldığı qrupda 1-ci yeri tutmalıdı. Mən De Byazinin dostu-qohumu deyiləm. Amma öz aramızdı, bu futbolçu resursu və potensialı ilə 10 gün ərzində 4 oyun keçirəcək komandadan liderlik tələb etmək ağılsızlıqdı, yoxsa məzələnmək?
Açığı, mən Samir Abasovu da az-çox başa düşürəm. “Neftçi”ni uzun fasilədən sonra çempion edən, amma son mövsümdə “Qarabağ”a müqavimətsiz boyun əyən adam indiyə qədər heç bir yaş qrupu üzrə yığmanı çalışdırmamaqdan dolayı bir qədər məsuliyyətsiz ola, yerli-yersiz yerli futbolçuların yarıtmazlığından danışa bilər. Bəs Qurban Qurbanovla Rəşad Sadıqova nə olub? Axı onlar yığmaların “sükanı arxasında” olublar, heyət formalaşdırmağın çətinliyini anlayırlar. Guya meydanda sayı bir vahid azalacaq yerli futbolçular bundan sonra dəridən-qabıqdan çıxacaq, hər cür fədakarlığa gedəcəklər. Təbii ki, mən bunun mümkünlüyünə inanmıram. Limit Azərbaycan futbolunun nəinki əsas, heç 2-ci, 3-cü, 4-cü problemi də deyil. Bizdə ciddi idarəçilik, vəsaitdən lazımi şəkildə yararlanmamaq, aşağı yaş qruplarında işin düzgün qurulmaması, kadrların yerində olmaması, şəxsiyyət problemləri var. Limit 7+4 yox, hətta 8+3 olsun, hər il iki klubumuz ÇL-in və ya KL-in qrupuna düşəcəksə, mən ikiəlli razıyam. Belə yanaşma hər nə qədər yığmanın maraqlarına və mənafeyinə zidd olsa da, azərbaycanlı futbolsevərlərin böyük turnirlərdə yığmalarını görmək arzusunu faktiki “dəfn etsə” də... Amma bizdə “Qarabağ”dan başqa müntəzəm sabit nəticələr göstərməyə qadir komanda və ya komandalar varmı? Birmənalı şəkildə yoxdu. Bir qədər sonra yığmaların və klubların Avropadakı nəticələrini görəcəyik, limit dəyişikliyinin mənasızlığını anlayacağıq və yenə də yada ...limit düşəcək. Ağıllı adamlar, adətən, başqalarının səhvlərindən nəticə çıxarır, hərəkətlərinə çəki-düzən verirlər. Biz isə 30 ildi müstəqil futbol təsərrüfatı qurmuşuq, hələ də inkişaf yolunu tapa bilmirik. Bacardığımız bir ayda iki dəfə limit iclasına yığışmaq və hər dəfə də fərqli qərar verməkdi. Yazıqlar olsun!

HUŞƏNG