Mayın 31-də AFFA İcraiyyə Komitəsinin növbəti iclası keçiriləcək.

"Football-plus.az" AFFA-nın saytına istinadən xəbər verir ki, "Dalğa Arena"nın ərazisində yerləşən Milli Komandaların Məşq Mərkəzində saat 17.00-da başlayacaq iclasın gündəliyinə aşağıdakı məsələlər salınıb:
1. AFFA-nın Yoxlama və Təftiş Komitəsinin Əsasnaməsinin müzakirəsi
2. AFFA-nın Lisenziya Komissiyasının müvafiq qərarına uyğun olaraq, “Turan-Tovuz” və “Kəpəz” klublarının 2022/2023-cü il mövsümündə Azərbaycan Premyer Liqasında çıxış etməsinin təsdiqi
3. 2022/2023-cü il mövsümündə Azərbaycan Premyer Liqasında legioner limitinin və əvəzetmə sayının müzakirəsi
4. İntizam Komitəsində vakant olan üzv vəzifəsinə yeni üzvün təsdiqi
5. Müvafiq komissiyanın təqdimatı əsasında futbol veteranlarına AFFA-nın təqaüdünün verilməsi
6. Digər məsələlər.
Zahirən burda heç bir qeyri-adi məsələ yoxdu. Yəni AFFA İcraiyyə Komitəsi istənilən vaxt yığışa, istənilən məsələni müzakirəyə çıxara bilər. Sadəcə, elə bu qurum aprelin 29-da legioner limitinin 6+5 kimi qalmasına və əvəzetmə sayının artırılmamasına qərar vermişdi. Bir ay içində nə oldu ki, İcraiyyə Komitəsi bu məsələyə dönməyi lazım bildi? Heç şübhəsiz, Qurban Qurbanovun və bəzi futbol adamlarının davamlı tənqidi, "biz nə desək də, AFFA bildiyini edir" məntiqi qurumu silkələyib. Artıq əminliklə demək olar ki, İcraiyyə Komitəsi həm legioner limitini dəyişəcək, həm də əvəzetmə sayını! Amma bunun Azərbaycan futboluna faydası dəyəcəkmi? Doğrudanmı, futbolumuzun əsas problemi bunlardı? Təbii ki, yox! Əlahəzrət Zaman tezliklə doğrunu da, yanlışı da göstərəcək!
ORXAN