"Atletlərimiz ölkənizi çox sevdilər" - Hindistanlı məşqçi
"Çempion olduğumuz üçün məmnunuq. Koronavirus pandemiyasına görə atıcılıq üzrə dünya kuboku yarışı keçirilmirdi. Bu da bizim üçün çətinlik yaradırdı. Ancaq bütün səylərimizi toplayaraq qalib olduq".
"Football-plus.az" xəbər verir ki, bu sözləri jurnalistlərə müsahibəsində dünya kuboku turnirində kişilər arasında 10 metr məsafəyə pnevmatik tüfəngdən atəşaçma üzrə komanda növündə qızıl medal qazanan Hindistan millisinin baş məşqçisi Suma Şirar deyib.
Baş məşqçi komandasının dünya kubokunun qalibi olmasının onu xoşbəxt etdiyini bildirib:
"İlavenil və Ramita ilk dəfədi ki, dünya kubokunda iştirak edirlər. Şreya isə artıq ikinci belə böyük turnirdə çıxış edir. Onlar uzun müddət idi ki, komanda halında məşq edirdilər. Öz təcrübələrini sübut etməyin vaxtı idi. Bakı Atıcılıq Mərkəzi olduqca möhtəşəmdi. Burda hər cür şərait var. Atletlər lazım olan hər şeylə təmin olunublar. Sözün açığı, qalib gəlməyimiz bizim üçün gözlənilməz oldu. Çünki rəqiblərimiz çox güclü idilər. Biz qısa müddət sonra Bakını tərk edəcəyik. Amma istəyərdik ki, Azərbaycanda daha çox müddət qalaq. Çünki atletlərimiz ölkənizi çox sevdilər”.
