"İnsanlarınız qonaqpərvərdi" - Serbiyalı çempion
“Bakıda dünya kuboku yarışında qızıl medal qazandığım üçün çox xoşbəxtəm. Birinci dəfə Bakıda 2017-ci ildə keçirilmiş İslam Həmrəyliyi Oyunlarında mübarizə aparmışdım və nəticədə 9-cu olmuşdum. Bu dəfə yarışlara daha yaxşı hazırlaşmışdım”.
“Football-plus.az” xəbər verir ki, bu sözləri jurnalistlərə açıqlamasında Bakıda atıcılıq üzrə keçirilən dünya kubokunda 10 metr məsafəyə tüfəngdən atəşaçma yarışında kişilər arasında qızıl medal qazanan serbiyalı Lazar Kovaçeviç deyib.
24 yaşlı atlet turnirin yüksək səviyyədə təşkil edildiyini bildirib:
“Yarışda atıcılar üçün hər bir şərait yaradılıb. İmkanlarımdan maksimum istifadə edə bildiyim üçün məmnunam”.
İdmançı Azərbaycanla bağlı xoş təəssüratları olduğunu bildirərək deyib:
“İnsanlarınız qonaqpərvərdi. Yarışın yüksək səviyyəsini, iştirakçılara diqqət və qayğını xüsusilə qeyd etmək istəyirəm”.
