İdman naziri Fərid Qayıbovun Bakıda keçirilən Atıcılıq üzrə dünya kubokunun yarışları haqda jurnalistlərə müsahibəsi...

- Siz yarışları izləyirsiz. Təəssüratlarınız necədi?

- Dünya kuboku ənənəvi yarışdı. Pandemiya zamanı keçirilməyib və indi ilk böyük miqyaslı yarışdı. 66 ölkədən 700-dən artıq idmançılar iştirak edir. Bu da dünya kuboku üçün böyük rəqəmdi. Bu turnir Azərbaycanın böyük yarışları qəbul edə bildiyinin sübutudu. Turnirin keçrildiyi məkan çox gözəldi. Bilirsiniz ki, Avropa oyunlarından öncə bura yenidən qurulmuşdu. Bu yarışdan öncə də Azərbaycan Atıcılıq Federasiya tərəfindən də bəzi təmir işləri görüldü. Görürük ki, yarışlar ən yüksək səviyyədə təşkil olunub. Beynəlxalq Atıcılıq Federasiyasının prezidenti də burdadı. Qeyd etdiyim kimi, 66 ölkənin idmançılarının, nümayəndələrinin olması, bir neçə ölkədə yarışların canlı yayınlanması sübut edir ki, Azərbaycanda bu idman növü düzgün inkişaf edir. İnanıram ki, nəticələrimiz də olacaq.

- Yarışlar olduqca gərgin keçir. Bu da onu sübut edir ki, bütün güclü idmançıların Azərbaycanda keçirilən turnirə marağı var. Məhz bu səbəbdən onlar dünya kubokunda iştirak edirlər?

- Bəli! Bizdə bu idman növündə Zemfira xanım Olimpiya çempionu olub. Olimpiya mükafatçımız da var. Bir müddət nəticələrimiz olmadı. Amma bu idman növündə bizim adət-ənənələrimiz var. Sadəcə, bunu geri qaytarıb, inkişaf etmək lazımdı. Bunun üçün işlər görülür. Federasiya bu məsələrlə bağlı çalışır. Biz də bunu görürük. Bilirsiniz ki, Ruslan Lunyov bu il çox yaxşı nəticələr əldə edib. Amma doğma meydanda həyacanlıdı. Amma onun hələ də medal qazanmaq üçün şansı var. İnanıram ki, bu il də onun üçün uğurlu olacaq. Ümumiyyətlə, digər idmançılarımız da müəyyən çətinlik dövründən sonra yaxşı nəticələr əldə edəcəklər. Komandamızın heyətində gənc atıcılarımız var. Yenə qeyd edirəm ki, bizdə atıcılıqla bağlı adət-ənənə var. Ən əsası da düzgün idarəçilik var. Düşünürəm ki, bunların hamısı nəticə verəcək.

- Özünüz nə vaxtsa həvəskar səviyyədə də olsa, atıcılıqla məşğul olmusunuzmu? Yarışları görəndən sonra siz də atıcılığa maraq yarandı?

- Mənim gözüm bir az pis görür. Məndə heç vaxt atıcılıq alınmayıb (gülür). Bizim məktəbdə bu idman növü üçün şərait var idi. Özümü Qəbələdə 1-2 dəfə stend atıcılığından yoxlamışam. Bir neçə dəqiq atışım olub.

- Dünya kubokunda medal qazanan bütün idmançılar Bakı Atıcılıq Mərkəzininin dünya standartlarından üstün olduğunu bildirirlər. Bunu Azərbaycan idmanı üçün yüksək göstərici hesab etmək olar?

- Əlbəttə! Bilirsiniz ki, burda ilk Avropa oyunları keçirildi. Həmin hadisə Azərbaycan üçün böyük nəticə idi. Oyunlar üçün fərqli məkanlar lazım idi. Yeni idman mərkəzləri tikildi. Mövcüd məkanlar təmir olundu. Bu gün ancaq Azərbaycana dünya kubokunda iştirak etmək üçün gəlmirlər. Bakı Atıcılıq Mərkəzinə dünyanın müxtəlif ölkələrindən təlim-məşq toplanışına gələnlər də var. Təbii ki, bu iqtisadi cəhətdən də bizim üçün yaxşıdı. Həm də azərbaycanlılar digər ölkənin atletləri ilə birgə məşq edirlər. Bundan əlavə, xariclərdən nəsə öyrənirlər. Bizim gözəl məkanlarımız çoxdu. Bilirsiniz ki, bizim gimnastika, su idmanı sarayımız var. Onlar təkcə Bakıda deyil. Bölgələrimizdə də bir-birindən gözəl idman mərkəzlərimiz var. Qəbələdə də atıcılıq üzrə dünya kuboku keçirilmişdi. Yəni biz bölgələrdə də beynəlxalq səviyyəli yarışlar keçirə bilirik. Təlim-məşq toplanışları üçün də Azərbaycan yaxşı yerdi. Dağlıq ərazilərimiz, dənizimiz var. Bir sözlə, Azərbaycan idman üçün hər cür şərait var. İnşallah, nəticələrimiz də buna uyğun olacaq.