Corco Kyellininin “Yuventus”dan gedəcəyini bəyan edəndən sonra daha bir müdafiəçinin məsələsinə aydınlıq gəlib.

Matteys de Liqtlə müqavilə yenilənəcək. İtaliya mənbələrinin xəbərinə görə, niderlandlı oyunçu Turin klubu ilə müqaviləsinin müddətinin 2026-cı ilin yayına qədər uzadılması ilə bağlı razılığa gəlib. Onun hazırkı anlaşması 2024-cü ilin iyununda qüvvədən düşəcək. De Liqt “Yuventus”da 2019-cu ildən çıxış edir. O, indiyədən ağ-qara formanı bütün turnirlərdə 116 oyunda geyib və 8 qol vurub.

Yeri gəlmişkən, Anxel Di Mariya karyerasını “Yuventus”da davam etdirəcək. Goal.com portalının məlumatında tərəflərin iyulun 1-də qüvvəyə minəcək birillik müqavilə üçün razılaşdıqları bildirilir. Turin klubu 34 yaşlı argentinalı yarımmüdafiəçi ilə sözləşməyə müddətin daha birilliyə uzadılmasını nəzərdə tutan bənd də daxil edib. Di Mariya PSJ-də 2015-ci ildən oynayır. O, ötən 7 il ərzində 19 titul qazanıb, bütün turnirlərdə 294 oyunda meydana çıxıb, 92 qol vurub və 118 məhsuldar ötürmə edib. Daha əvvəl “Mançester Yunayted”, “Real”, “Benfika” və “Rosario Sentral”da oynayan Anxel “Yuventus”a azad agent kimi keçəcək.