Region Liqasında yarımfinalında məğlub olan "Xan Lənkəran"ın baş məşqçisi İbrahim Uzuncanın "Football-plus.az" saytına müsahibəsi.

- "Araz Naxçıvan"la oyunda qələbə üçün nə çatmadı?

- Görüş istədiyimiz kimi başladı. Oyunla bağlı sıxıntı yox idi. Xüsusilə ilk 45 dəqiqədə üstünlük bizdə idi. Hər şey əla gedirdi. 4-5 təhlükəli epizodumuz oldu. Komanda var gücünü ortaya qoydu. Futbolçular ilk yarıda bizə yaraşan oyunu oynadılar. İkinci hissə başlamamış 1:0-ın təhlükəli olduğunu, diqqətli olmalarını söylədim. İkinci yarıda 5 dəqiqə ərzində hər şey dəyişdi. Futbolçuların fərdi səhvləri, bir anlıq fikir dağınıqlığı nəticəsində qapımızda iki qol gördük. Rəqib həmçinin yaxşı müdafiə olundu. Biz isə rəqibin dirənişinə qarşılıq verə bilmədik. Bu üzdən uduzduq. Birinci və ikinci hissə arasında dağlar qədər fərq var idi. Biz tədbirlərimizi almışdıq. Futbolda bəzən üstün oynayarsan, top ən çox səndə ola bilər, amma uduza bilərsən. Biz də bunu yaşadıq. Futbolçularımı yarımfinala qədər gəldikləri üçün təbrik edirəm. Futbolda səhvlər olur. İnsan öz qapısına da qol vura bilər. Çıxdıq, mübarizə apardıq. Bu günə qədər heç uduzmamışdıq. Məğlub duruma düşüncə, tələsdilər. Bu da bizə dərs oldu. Heç vaxt rəqibin güclü və ya gücsüz olduğuna baxmırıq. Rəqib xüsusilə 2-ci qolu vurandan sonra daha istəkli oynadı. Hakimin 60-cı dəqiqədə ikinci sarı vərəqə ilə rəqib futbolçunu meydandan qovmaması da onların ayaqda qalmasına təsir etdi. 1:2-dən sonra müdafiə olundular. Biz isə ikinci hissədə öz oyunumuzu göstərə bilmədik. Rəqibi mübarizəsinə görə təbrik edirəm. Finalda oynayıb, kuboku qaldırmağı çox istəyirdik. Amma bəzən çox istədiyin şeylər olmur.

- Komandada sanki ruh düşkünlüyü var idi. AFFA-nın məlum qərarı buna səbəb ola bilər?

- Komandamın ruhu ilə bağlı nəsə demərəm, kiməsə də icazə vermərəm nəsə desin. Hamısı xarakterli futbolçulardı. Futboldu. 30 dəqiqə əvvəl bir, daha sonra başqa cür oynaya bilərsən. Hər futbolçunun başına gələcək durumdu. Mütləq bir problem çıxır. Komandanın ruhu yerində idi. Amma AFFA-nın verdiyi qərar 100 faiz təsir edib. Çünki futbolçuları 21 gündə ancaq toplaya bildik. Matçlar davam edərkən 21 gün fasilə olar? Bu da bir az düşündürücü durumdu. Bir həftə ola bilər, amma 21 gün müəmmalıdı. Bu qərarın təsir etməməsi üçün əlimizdən gələni etdik. Əlbəttə, bu bəhanə deyil və bunu8n arxasına sığınmıram. Qalib gəlməliydik. Bu dəfə uduzduq və çox üzüldük. Finala çıxmamaq bizə yaraşmadı. Rəqibə finalda uğurlar arzu edirəm.

- Ötən dəfə “Mahsun Qənbərlini vacib oyunlar üçün saxlayıram” demişdiz. Onu yenə əsas heyətdə meydana buraxmadız...

- Bizim 25 nəfər oyunçumuz var. Hamısı da bir-birindən qiymətlidi. Son 2 oyunda qələbə qazanan heyəti meydana buraxdım. Bu, digər oyunçulardan narazı olduğum anlamına gəlməməlidi. Həmişə onlarla danışıram. Mənim kapitanım Mahsundu. Sadəcə, seçimi son 2 oyuna görə etdim. Bu heyətlə oyuna çıxmalıydıq. Mahsun və digər oyunçularla da bu haqda danışdım. Bizim aramızda belə problem ola bilməz. Mahsun mövzusu haqda çox danışmaq istəmirəm. O mənim futbolçumdu. Heç oynamayanlar da mənim futbolçularımdı. Səhvlər edən futbolçunun əvəzinə də Mahsunu buraxdım. Amma alınmadı, məğlub olduq. Canları sağ olsun.

- Komanda 1-ci diviziona buraxılmasa, qalmağı düşünürsüz? Başqa təkliflər gəlsə, dəyərləndirəcəksiz?

- Hazırda üçüncülük oyunu barədə düşünürəm. Mən indi Lənkəran klubunun məşqçisiyəm. Son günə qədər də çalışacam. Rəhbərliyin verəcəyi qərara hörmət edirəm və razılaşıram. Klubun rəhbəri “Araz Naxçıvan”la oyundan sonra mənə dedi ki, hədəflərimiz böyükdü, sən bizim hocamızsan, bu yolu birlikdə gedəcəyik.

GÜNAY VƏLİYEVA