Region Liqasında ikinci finalçı bəlli oldu.

Bu, "Araz Naxçıvan"dı. Naxçıvan təmsilçisi yarımfinal görüşündə çempionatın favoritlərindən "Xan Lənkəran"ı yendi - 2:1. Qarşılaşmadan sonra qaliblərin baş məşqçisi Azər Bağırov "Football-plus.az" saytının suallarını cavablandırdı.

- Bugünkü qələbə barədə təəssüratınız...

- Çox maraqlı oyun keçdi. Bunu hamı gördü. Azarkeşlərimiz sağ olsun, bizi sonadək dəstəklədi. Bir də rəqibin prezidenti sağ olsun ki, komandamıza yaxşı "qıcıq" verdi. Motivasiyamız var idi. Amma o sözlə daha da artdı. İkinci hissə planlaşdırdığımız kimi keçdi. İlk yarıda bəzi istəklərimiz alınmadı. Əsas odu ki, sonda qələbə qazandıq.


- Oyunun axarı 3 əvəzetmədən sonra dəyişdi. Bu, taktiki gediş idi?

- Bəli. Planımız bu idi. İkinci hissəyə belə hazırlaşmışdıq. İkinci yarıda tam başqa taktika ilə oynayacaqdıq. Təbii ki, birinci hissədə hesabı qorumaqla bunu edəcəkdik. Daha çox qol vura bilərdik. Bunu hər kəs gördü.

- Dünənki görüş barədə nə deyə bilərsiz?

- Dünən də çox maraqlı oyunun şahidi olduq. "Cəbrayıl" geridönüş edərək oyunu qazandı. Asan rəqib olmayacaq. Təhlükəli futbolçuları var. 4 günümüz var, həmin görüşə hazırlaşacağıq. Həm motivasiya, həm də psixoloji baxımdan oyuna hazır olmalıyıq.

- Final görüşü Şamaxıda olacaq. Bu barədə fikriniz nədi?

- Şamaxı da bizimdi. Öz evimiz kimi hiss edirik. Yəqin ki, azarkeşlərimiz ora da gəlub, bizi dəstəkləyəcək. Ümid edirəm ki, tamaşaçılar üçün maraqlı və yaxşı oyun sərgiləyəcəyik.

GÜNAY VƏLİYEVA