Region Liqasının yarımfinal mərhələsinin ikinci görüşü bu gün keçiriləcək.

"Xan Lənkəran" "Araz Naxçıvan" ilə qarşılaşacaq. Görüş saat 16.00-da, "ASK Arena"da baş tutacaq. Matç böyük maraqla gözlənilir. Qarşılaşmadan öncə Lənkəran təmsilçisinin baş məşqçisi İbrahim Uzunca "Football-plus.az" saytının suallarını cavablandırıb.

- Yarımfinalın ilk oyunu barədə nə düşünürsüz?

- Belə deyim ki, temp çox aşağı idi. Oyun çox dayandı. Yarımfinala yaraşan görüş deyildi. Temp baxımından deyirəm bunları. Oyunda çox futbolçu yerdə qaldı.

- Sizcə, futbolçular bilərəkdən edirdilər ?

- Dəqiq deyə bilmərəm bunu. Temp aşağı idi. Aşağı templi oyunda niyə bu qədər zədə epizodları olsun ki? Futboldu bu. Bəzən çox templi oyunda da məğlub olarsan.

- Bugünkü qarşılaşmadan gözləntiniz nədi?

- Bilirsiz ki, matç-matç baxıram hər oyuna. Təbrik edirəm "Cəbrayıl"ı. Finala çıxmaq üçün bu günkü oyunda qələbə qazanmalıyıq. Ən yaxşı şəkildə hazırlaşmışıq görüşə. Bu kollektivin gücünü, həqiqətən bu liqanın üstündə bir komanda olduğunu bu gün sübut etmək istəyirik. Bunu sözlə yox, meydanda edəcəyik. Mən futbolçularıma inanıram.

- Finalda rəqib kimi "Qusar"ı gözləyirdiz. "Cəbrayıl" sizin üçün sürpriz oldu?

- Bəli, qatılıram sizə. "Qusar"ı gözləyirdim. Amma futboldu bu. Hər nəticə qazanmaq olur.

- AFFA-nın qərarı komandanın çıxışına təsir edə bilərmi?

- Bu barədə oyunlar bitəndən sonra danışacağıq.

- "Araz Naxçıvan" 1-ci diviziona vəsiqəni artıq təmin edib. Siz onları məğlub edərək özünüzü sübut etmək istəyirsiz?

- Biz hər rəqibə hörmət edirik. Meydanda gücümüzü göstərmək istəyirik. Rəqibimiz kim olur olsun oyunumuzu oynayacağıq. Biz öz oyunumuza baxırıq. Bəzən bir qapı oynayarsan amma uduzarsan. Futboldu bu. Bu komandanın 1-ci diviziona və daha artığına layiq olduğunu sübut etmək istəyirik.

- "Cəbrayıl"ın əsas gücü nədədi?

- Bu barədə dəqiq nəsə demək olmur. Ola bilsin ki, komanda bu gün başqa taktika ilə oynadı, bizimlə başqa cür oynayacaqlar. Rəqibimiz bizə qarşı belə tempsiz oynacayağına inanmıram. Bu gün "Cəbrayıl" meydanda tez yoruldu. Meydana fərqli çıxa bilərlər. Özümüzü ona görə hazırlayırıq.

- "Araz Naxçıvan"ın baş məşqçisi bir neçə dəfə Lənkərana gələrək sizin oyunları təhlil edib, bəs siz onların oyunlarına baxmısız?

- Mən onların oyunu barədə elə də məlumatlı deyiləm. Çünki nə video tapa bildim, nə də gedib baxa bildim. Rəqib kim olursa - olsun biz çıxıb oyunumuzu oynayacağıq. Futbol meydanda həll olan məsələdi. Özümüzü sübut edəcəyik. Görüşdən sonra deyə bilərəm ki, bizim komandanın gücü budu.

- Final Şamaxıda olacaq. Bu barədə nə demək istəyirsiz?

- Bu qərarı verənlərə hörmət edirəm. Meydanın fərqi yoxdu. Harda qərar verilibsə çıxıb oyunumuzu oynayacağıq.


GÜNAY VƏLİYEVA, İLKİN SULTANLI