“Araz Naxçıvan”a böyük hesabla qalib gəlməli olan komanda indi belə bəhanələr axtarır” - Azər Bağırov
Region Liqasının yarımfinal mərhələsinin oyunları başa çatdı. “Cəbrayıl” “Qusar”ı, “Araz Naxçıvan” isə “Xan Lənkəran”ı 2:1 hesabı ilə məğlub edib adını finala yazdırdı.
“Araz Naxçıvan”ın “Xan Lənkəran”ı üstələməsi bir çoxları üçün gözlənilməz oldu. Lənkəran təmsilçisinin düşərgəsindən gələn iddialı açıqlamalar, komandanın heyətində güclü futbolçuların yer alması fərqli düşünməyə əsas verirdi. Amma futbolda nəticə meydanda qazanılır.
Mayın 15-də “ASK Arena”da baş tutan “Xan Lənkəran” - “Araz Naxçıvan” matçı ilə bağlı redaksiyamıza məlumat daxil olub. Lənkəranlılar iddia ediblər ki, Muxtar Respublika təmsilçisi iki peşəkar futbolçunun xidmətindən yararlanıb. Bu üzdən oyundan sonra komandaların rəsmiləri arasında söz-söhbət yaranıb. Məsələyə Region Liqasının təşkilatçıları müdaxilə edib.
Başverənləri dəqiqləşdirmək üçün “Araz Naxçıvan”ın baş məşqçisi Azər Bağırovla əlaqə saxladıq. PRO kateqoriyalı mütəxəssisin “Xan Lənkəran”ın iddiasına cavabı belə oldu: “Vadim Abdullayev və Elməddin Sultanov ilə bağlı problem yaradırlar. Deyirlər ki, peşəkar statusları var. Mən “Araz Naxçıvan”a gələndə mart ayı idi. İndi də mayın günlərini yaşayırıq. Biz bu futbolçuların adını federasiyaya təqdim etmişik. Onların peşəkar statusu olsaydı, həmin vaxt problem yaranardı. Komandamın heyətində 2001, 2002-ci illərdə doğulan uşaqlar var. İndiyə qədər 1-ci divizion səviyyəsində oynamayıblar. Vadim də, Elməddin də 2011-dən bəri hansısa çempionatda çıxış etməyib. Rəqibi başa düşürəm. Amma oyunu uduzandan sonra belə şeylərin ortaya atılması gülüncdü. “Araz Naxçıvan”a böyük hesabla qalib gəlməli olan komanda indi belə bəhanələr axtarır. Bunun özü artıq başqa şeylərdən xəbər verir. Biz oyundan öncə nəsə danışmadıq. Dedik ki, matçdan sonra danışacağıq. Allaha həmd olsun ki, qələbə qazandıq. İstənilən halda qalibik. Onlar da əvvəlcədən bilirdilər ki, kimə qarşı və necə oynayırlar. Qalan şeylər “Araz Naxçıvan” və federasiya rəhbərliyinin danışacağı, həll edəcəyi mövzulardı. Bu məsələdə haqlı tərəfik. Elməddin 2001-ci ilin mayından Azərbaycandadı. Uzun müddətdi klubsuzdu. Vadim də həmçinin. Onlar Azərbaycanda heç bir peşəkar klubda oynamayıblar. UEFA-nın da qaydalarına görə bir futbolçu 2 ay maaş almadısa, artıq həvəskar statusu daşıyır. Hər şey bu qədər bəsitdi”.
İLKİN SULTANLI
Digər xəbərlər
