"Xan Lənkəran"ın prezidenti Pərviz Hüseynovun "Football-plus.az" saytına müsahibəsi...

- "Cəbrayıl" - "Qusar" matçı haqda nə deyə bilərsiz?
-Hər iki komandanın yaxşı oyunçuları var. Matçında sonunda "Qusar" qol vurdu. Lakin hakim həmin epizodda oyundan kənar vəziyyət qeydə aldı. Mən bunla azı deyiləm. Oyunda olan yanlış hakim qərarlarına qarşıyam. Bu gün də yanlış qərar oldu. Belə oyun aparmaq olmaz. Yenə deyirəm, mən belə şeylərə qarşıyam. Ümumi atmosfer isə yaxşı idi. Bəyəndim.

- Oyunun nəticəsindən razısız? Deyəsən, finalda "Qusar"ı gözləyirdiz?
- Yəqin ki, razıyam. Bəli, "Qusar"ı gözləyirdik. Hətta biz mövsümün əvvəlindən Qusar təmsilçisi ilə finala hazırlaşırdıq. Pley-off nəticələrinə baxanda "Qusar"la finalda qarşılaşacağımızı zənn edirdik. Amma "Cəbrayıl" da yaxşı oynayır. Cavid Hüseynov bu vaxta qədər çox əziyyət çəkib. O, komandanı finala qədər gətirib çıxardı. Afərin!

- Hesab edirsiz ki, finalda rəqib "Qusar" olsaydı çətin olacaqdı?
- Onlar aqressiv futbol sərgiləyirlər. Maraqlı final görüşü olacaqdı. Mən belə düşünürəm. "Qusar" fiziki olaraq çox güclü komandadı. Bizim kollektivlə eynidi deyə bilərəm. Biz heç bir komandadan qorxmuruq. 90 dəqiqə vaxtımız var ki, futbolun nə olduğunu göstərə bilək.

- Sabahkı oyun üçün futbolçula hansısa mükafat nəzərdə tutmusuz?
-Biz mükafatlar, məvacib, xərclərimiz, müqavilələr ilə bağlı məlumat vermirik. Futbolçu özü nəyisə danışmaq istəyirsə, edə bilərik. Onun buna hüququ çatır. Amma klub tərəfindən bizim ixtiyarımız yoxdu ki, nəsə deyək. Bunu qeyd edim ki, çox böyük pullar xərclənir. Onlar hər şeyi gözəl bilir. Onların motivasiyası da var. Bizim futbolçularımıza qarşı heç bir şübhəmiz yoxdu. Onlar nə istəyir, biz onu edirik.

- AFFA-nın qərarı komandanızı ruhdan salmır?

- Xeyr, heç bir qərar bizi motivasiyadan sala bilməz. Bu, bizim əleyhimizə haqsızlıq olsa belə. Öz işimizə baxırıq. Böyük planlarımız var. Bunun istiqamətdə çalışırıq.

- "Qobustan"ın vitse-prezidenti qəzetimizə açıqlama verib ki, varisliklə bağlı sənədləşmə işinə artıq başlamışıq. Nazir Fərid Qayıbov da bildirdi ki, AFFA yeni bir qərar verməsə, klub rəhbərliyi bizə müraciət edə bilər.
- Fərid Qayıbovla görüşümüz olmalı idi. Müharibəyə görə mən Rusiyadan gələ bilmədim. Həmin vaxt uçuş yox idi. Buna görə görüşümüz təxirə düşdü. Fikirləşirəm ki, başqa bir klub varisliyi götürüb 1-ci divizionda iştirak edə bilirsə, biz də edə bilərik. Çünki, biz də layiqik. Klubda çox işlər görülüb. Rəsmi qurumlarla görüşüb bu haqda mütləq müzakirələr edəcəyik.

- Yayılan məlumatlara görə, 1-ci divizionda iştirak etmək üçün əsas problemlərdən biri "Xan Lənkəran"ın gəlirlərinin hardan qaynaqlandığı ilə bağlı sənədlərin göstərilə bilməməsidi. Bu haqda nə deyə bilərsiz?
- Yalan söhbətdi. Bunu sübut edə bilərəm. Bu yaxınlarda da yerli saytların birində yazılmışdı bu barədə. Guya AFFA bizdən sənəd tələb edib və onu göstərə bilməmişik. Açıq sizə deyim. Bu gün də o sənədləri göstərə bilərik. O qədər sənəd göstərə bilərik ki, heç bir il vaxt çatmaz onlara baxmağa. Bizim üçün heç bir problem yoxdu. Mən şəxsi pulumu xərcləyirəm. Deyilər ki, guya bizə kimsə dəstək olur. Amma elə deyil.

- Bəlkə bu olanlar Mübariz Mənsimov ilə olan dostluq münasibətinizə görədi?
- Düşünmürəm ki, bu olanlar Mübariz müəllimlə çəkdirdiyimiz şəkilə görədi. Biz həmin görüşdə stadionun məsələsini həll etdik. Çünki Mais müəllimlə müqavilə əsasında stadion götürmüşdük. Mais müəllim qayda pozuntusu etdi. Öz məsələlərini həll etməyə başladı. Məşq alətlərini, kabelləri satmağa başladı. Bu, məni qane etmədi. Biz də buna görə Lənkəran İdman Kompleksinə getməli olduq. Sonra uşaqları Türkiyəyə təlim-məşq toplanışına apardıq və ordan qayıdandan sonra təklif olundu ki, Mübariz müəllimlə görüşək. Biz də razılaşdıq. Mübariz bəy yaxşı adamdı . Ona rəğbət bəsləyirəm. Kimin kiminləsə prinsipi varsa, buraxın özləri məsələni həll etsin. Bunu edə bilirsə, etsin. Bizim heç kimlə belə bir problemimiz yoxdu. Bəzi xəbərlər eşitmişik. Elə söhbətlər gəzir ki, guya Mübariz müəllim bizi maddi cəhətdən dəstəkləyir. Bu, doğru deyil, amma, o, bizə hər cür köməyi, dəstəyi təklif etmişdi. Nəsə lazım olarsa, ona xəbər etməyimizi demişdi. Amma biz bunu etmirik və öz işimizi görürük .

- Sabah hansı atmosferi gözləyirsiniz ?
- Heç kəsə sirr deyil ki, mən fanatlarla çox yaxınam. "İnstaqram" vasitəsilə onlar mənə arzularını yazır. Mən onların ümumi düşüncələrini bilirəm . Ona görə sabaha tam hazır olacağıq . Biz "master-klass" göstərəcəyik . Yarım ildi ki, hər həftə məşq edirik, hazırlaşırıq. Bu məşqlərin nəticəsini sabah göstərməyə çalışacağıq.

- Fanatlara qələbə sözü verirsiniz?
- Onlara sabah 2 dəfə artıq qələbə sözü veririk . Çoxları deyir ki, Naxçıvan təmsilçisi bizə görə çox ciddi rəqibdi. Amma mən belə düşünmürəm. Düşünmürəm ki, Naxçıvan təmsilçisi bizə görə ciddi rəqibdi. Onlar öz qruplarında zəiflərlə qarşılaşdılar ve xal yığdılar. İndi onlar əsl bombardirlərlə, əsl məğlub edilməz klubla qarşılaşacaqlar. Hansı ki, biz 1 il əvvəl bu komandanı qurmuşuq.

-Görüşün belə asan olacağını düşünürsüz?
- Şəxsən belə düşünürəm. Mənimlə vitse-prezident və məşqçi razılaşmır. Şəxsən düşünürəm ki, bu görüş bizim üçün asan olacaq.

Qeyd edək ki, "Xan Lənkəran" - "Araz Naxçıvan" matçı mayın 15-də, saat 16.00-da "ASK Arena"da baş tutacaq.

GÜNAY VƏLİYEVA, İLKİN SULTANLI