Region Liqasında birinci yarımfinal görüşü keçirilib.


"Cəbrayıl" "Qusar" ilə qarşılaşıb. Görüş Cəbrayıl təmsilçisinin 2:1 hesablı qələbəsi ilə yekunlaşıb. Oyundan sonra komandanın baş məşqçisi Cavid Hüseynov "Football-plus.az" saytının suallarını cavablandırıb:

- Görüş barədə təəssüratınız necədi?

- Oyunun ağır keçəcəyi bəlli idi. Çünki bir neçə gün öncə "Qusar" 1-ci divizionun çempionu "Qaradağ Lökbatan" üzərində inamlı qələbə qazanmışdı. Gedib izlədim. Çox yaxşı oyun sərgilədilər. Ona görə çox ciddi rəqib olduğunu bilirdik. Çox sevinirəm ki, futbolçularım bu gün layiqli mübarizə apardılar, xarakter göstərdilər və qələbə qazandılar.

- Əzmkar qələbə qazandız. Bunda ən vacib amil nə oldu?

- Futbolçuları hazırlayanda da demişdim ki, bu yarımfinal oyunudu. 120 dəqiqə də oynaya bilərik, penalti seriyasına da gedə bilər. Oyunu psixoloji cəhətdən, soyuqqanlı şəkildə əldən vermək olmaz. Matçın ilk 15-20 dəqiqəsində özümüzdə deyildik. Futbolçularda həyəcan var idi. Ehtiyat edirdilər ki, birdən səhv edərlər. İstər həyəcan, istər ehtiyat həddən artıq çox olanda səhvlə nəticələnir. Taktiki gedişi 20-ci dəqiqədən sonra etdik. Onun da bəhrəsin gördük.

- İki təcrübəli futbolçunu oyuna sonradan buraxdız. Bu taktiki gediş idi?

- Tural da, Rəhman da bizim üçün vacib futbolçudu. İkisi də təcrübəlidi. Hər oyunçumuz bizim üçün önəmlidi. Sadəcə, Turalın zədəsi var idi, yeni sağalıb. Ona dedim ki, bu gün çıxıb qol vurmaq sənin haqqındı. Çünki iki aya yaxındı burdasan və iki aydı zədəlisən. O da sözünü tutdu və qolunu vurdu.

- Tapdıq qol vurmayanda düşündüz ki, uğur sizdən üz döndərdi?

- Bunu təcrübəli futbolçu kimi çox keçmişəm. Hakimin son fitinə qədər heç nə bitmir. Onu mən çox yaxşı başa düşürəm.

- Finalda kimi rəqib görürsüz?

- Hər 4 komanda layiqdi. Fərq etmir. Amma Lənkəran təmsilçisi ilə daha maraqlı olar. Güclü kimdi, onunla qarşılaşmaq istəyirik.

GÜNAY VƏLİYEVA, İLKİN SULTANLI