“Cəbrayıl”a necə uduzduğumuzu bütün Azərbaycan gördü" - "Qusar"ın baş məşqçisi
“Bürünc medal matçında məğlub olduq. Rəqib komandanı təbrik edirəm. “Araz-Naxçıvan” yaxşı mübarizə apardı, qələbəyə layiq idilər. Biz də yaxşı mübarizə aparsaq da, imkanlardan yararlana bilmədik. Bu futboldu, nə edək, bəxt gətirməyəndə gətirmir”.
Bu sözləri “Futbol+”ə açıqlamasında Mahəddin Ağamov deyib. “Qusar”ın baş məşqçisi Region Liqasında bürünc medal uğrunda matçda “Araz Naxçıvan”a məğlub olmalarını şərh edib:
“Qırmızı vərəqə almağımız da bizə təsir etdi. Ümumilikdə komandanın çıxışından razı qaldım. İlk gündən məqsədimiz bu idi ki, çempion olaq. Çox yaxşı komandayıq. Nizam-intizam öz qaydasındadı. Bütün oyunları həvəslə oynayırdıq. “Cəbrayıl”a necə uduzduğumuzu bütün Azərbaycan gördü. Bizə qarşı haqsızlıq oldu. Hakim ədalətsizlik etdi. VAR-mız yoxdu ki, göstərək ki, həmin epizodda oyundankənar vəziyyət yox idi. Komandanın gələcəyi ilə bağlı nəsə deyə bilmərəm. Hər şey rəhbərlikdən asılıdı. Ümid edirik ki, yaxşı olacaq. Qusar futbolunu yaşatmağa çalışırıq. Əlimizdən gələni edəcəyik ki, hər şey yaxşı olsun. Çempion olan “Cəbrayıl”ı təbrik edirəm. Final matçında özlərini yaxşı tərəfdən göstərə bildilər”.
İLKİN SULTANLI
