“Çelsi” şənbə günü səhər saatlarında rəsmi saytı vasitəsilə son razılıqdan xəbər verib: klub Roman Abramoviçdən başqasının mülkiyyətinə keçir.

Əvvəlcə xəbərin qısa məzmununu anladaq: Todd Boeli, Mark Uolter və Hansyorq Vissin rəhbərlik etdiyi yeni sahibkarlar qrupu ilə şərtlər razılaşdırılıb, bu məsələ dövlət və premyer-liqa ilə də razılaşdırıldıqdan sonra mayın sonunda satış əməliyyatı bitəcək, sövdələşmə ilə bağlı bütün detallar onda açıqlanacaq.

Klub neçəyə satılıb və pul hara gedəcək?

“Çelsi” dərhal detalları açıqlayıb. Yeni sahiblərin investisiyasının ümumi həcmi 4,25 milyard funt (4,9 milyard avro) olacaq. Bu məbləğ iki hissədən ibarətdi. Klubun səhmlərinə görə ödəniş 2,5 milyard funtdu. Yəni Abramoviç klubu sakit şəraitdə satsaydı, bu pul ona çatacaqdı. Amma yəhudi milyarder Rusiyanın Ukraynaya hərbi təcavüzünə görə sanksiyalara məruz qaldığından pul Britaniyadakı bank hesabına köçürüləcək və o, həmin puldan yararlana bilməyəcək. Əvvəlcədən nəzərdə tutulduğu kimi, 2,5 milyard funt xeyriyyə məqsədi ilə xərclənəcək. Klub razılıq əldə olunan gün bir daha bu planı təsdiqləyib. 1,75 milyard funt isə yeni sahiblərin kluba yatırımıdı. “Çelsi” bildirir ki, bu məbləğ inkişaf layihələrinə xərclənəcək: stadiona, klub akademiyasına, qadınlardan ibarət komandaya və s. və i.a.

“Çelsi”ni kim alıb?

Tedd Bolei – Los-Ancelesin “Docers” beysbol klubunun həmsahibi (səhmlərin 20 faizinə malikdi), amerikalı biznesmen. 46 yaşı var, 4,5 milyard dollar varidata malikdi.

Mark Uolter – o da amerikalıdı, “Docers”in əsas sahibidi. Britaniya mediasının yaydığı xəbərə görə, prosesin gedişində Boelinin dəvəti ilə bu işə qoşulub. 62 yaşlı biznesmenin 3,9 milyard dolları var.

Hansyorq Viss – tibb sahəsində var-dövlətə yiyələnən isveçrəli sahibkar. “Çelsi”yə yiyələnməklə bağlı təklif aldığını etiraf edən ilk şəxslərdən biridi. 86 yaşı, 5 milyard dolları var.

Yuxarıda vurğuladığımız kimi, bu sövdələşməni hakimiyyət orqanları və İPL də təsdiqləməlidi. Britaniya hökumətinin satışla balı verdiyi lisenziyanın fəaliyyət müddəti mayın 31-də bitir. Məhz buna görə Boeli sövdələşməni üç həftə ərzində bitirməyə köklənib. İPL-in yeni sahibləri və klub direktorlarını yoxlaması standart prosesdi. Təbii ki, əsas addım atılıb – tərəflər alış-satış şərtlərini razılaşdırıb.

Yeni sahiblərin qarşısında qoyulan şərtlər

“The Telegraph” xəbər verir ki, yeni konsorsium klubun idarəçiliyinə görə 2032-yə qədər dividend götürməməlidi. Qarşıdakı 10 ildə səhmlərin satışı da qadağandı. Kluba müəyyənləşdirilən borc hüdudlarından kənara çıxmaq sərt şəkildə qadağan olunub.

İndi də Boelinin personası ilə yaxından tanış olaq. O, ABŞ-ın ən qədim ali təhsil müəssisələrindən olan Uilyam və Meri (Virciniya ştatı) kollecində təhsil alıb. Todd etiraf edir ki, ortabab tələbə olub və universiteti bitirəndən sonra maliyyə sahəsinə necə qədəm qoyacağını bilmirmiş. Hərçənd məhz “Maliyyə idarəçiliyi” ixtisası üzrə təhsil alıb. Belədə uğur üçün mütləq nəsə tələb olunurdu. Məktəb müəlliminin məsləhəti ilə Todd “Siti” bankının London filialında staj keçmək üçün ərizə yazır. Praktika ilə paralel London İqtisadiyyat Məktəbində də təhsil alır. Ardından ABŞ-a qayıdır, 1996-cı ildə İsveçrənin maliyyə konqlomeratı “Credit Suisse Group”un investisiya-bank bölməsi olan “CS First Boston”da işə başlayır. Həmin andan etibarən karyerası yüksəliş mərhələsinə qədəm qoyur. 5 ildən sonra “Guggenheim Partners” bankına keçir, burda kredit-investisiya biznesini işə salır və bir qədər sonra prezident vəzifəsini tutur.

Boeli uğur tarixçəsini bu sözlərlə anladır:

2012-ci ildə Boeli “Los-Anceles Docers” beysbol klubunun həmsahibinə çevrilir. Onun da sıralarında olduğu “Guggenheim Baseball Management” konsorsiumu klubu 2,15 milyard dollara alır. Həmin vaxt bu, tarixdə peşəkar idman komandasının satılmasına dair ən nəhəng müqavilə idi. Əvvəlki rekord “Mançester Yunayted”i alan Qleyzerlərə məxsus idi. “Docers” həmin vaxtdan bəri 8 dəfə öz divizionunun, 3 dəfə Milli Liqanın, nəhayət, 2020-də isə əsas beysbol turniri olan Dünya Seriyasının qalibi olub.

Todd 2015-də “Eldridge Industries” holdinqini yaradıb. Bu holdinqin hazırda maliyyə, media, idman, daşınmaz əmlak və texnologiya biznesi sahəsində çalışan 80-ə yaxın şirkətdə payı var. Daha bir maraqlı detal: “Forbes”in dəyərləndirməsinə inansaq, Boelinin şəxsi varidatı 4,5 milyard dollar təşkil edir (müqayisə üçün xatırladaq ki, “Forbes” apreldə Abramoviçin sərvətini 6,9 milyard həcmində dəyərləndirib).

2019-da da “Çelsi”ni almağa cəhd edib

2019-da “Bloomberg”ə müsahibə verən Todd adi futbolu Amerika futbolu ilə müqayisə etmişdi:



Elə həmin il Todd Abramoviçə klubu 3 milyard dollara almaq təklifi ilə müraciət etmiş, lakin rusiyalı biznesmen təklifi yaxın buraxmamışdı.
Boeli fanat bazasına xitab edir

Əlbəttə, Boeli “Docers”i təkbaşına idarə etmir. Ancaq bu klubdakı fəaliyyətinə söykənib, “Çelsi”də yürüdəcəyi siyasəti də proqnozlaşdırmaq olar. O, yaxınlarda “Yahoo Finance”a verdiyi müsahibədə fanatları idmanın ən vacib hissəsi adlandırmış, diqqəti məhz azarkeşlərə yönəltməyə çağırmışdı. 46 yaşlı biznesmen “Çelsi”ni almaq ərəfəsində “Docers” nümunəsi əsasında bir daha fanatlarla işin vacibliyini izah edib:



ORXAN