“Qəbələ” ilə oyundan sonra Samir Abasov yenə mətbuatın gündəmini zəbt edib.

Bəli, çalışdırdığı komanda Konfrans Liqasına vəsiqə uğrunda az qala son damla qanından keçməyə hazır olan “Qəbələ”yə yenildi. Lakin ictimaiyyət, xüsusilə də “Neftçi” fanatları baş məşçqçini məğlubiyyətə yox, oyundan sonra onu istefaya səsləyən azarkeşlər barədə söylədiyi fikirlərə görə “yıxıb-sürüyür”.

Abasov yerli məşqçilər arasında özünəxas xarizmaya sahib, sözü üzə deyən, işini itirməkdən qorxmayan azsaylı mütəxəssislərdəndi. Bəlkə də onun əvəzinə başqa çalışdırıcı olsaydı, “Neftçi”dəki postunu itirməmək üçün hər fürsətdə azarkeşə, rəhbərliyə xoşgələn açıqlamalar verər, bəziləri kimi pafoslu fikirlər sələndirərdi. Ancaq onu ictimaiyyətə sevdirən, Samiri Samir kimi tanıdan da məhz xarakteri, ağa “ağ”, qaraya “qara” deməsidi.
Ümumiyyətlə, son vaxtlar ölkədə qəribə bir tendesiyanı müşahidə edirəm. Səbəbini bilmirəm, ancaq əksəriyyət düzgün olanı bir tərəfə qoyub, şirin yalanlar eşitmək istəyir. Məsələn, yığmanın baş məşqçisi Canni de Byazi İtaliya mətbuatına açıqlamasında Azərbaycan yığmasını xaraktersiz adlandırmışdı. Həmin vaxt kütlə az qala italiyan mütəxəssisi edam etmək, qoşa qala qapısının qarşısında dar ağacından asmaq istəyirdi. Niyə? Özümüz də yaxşı bilirk ki, De Byazi olanı deyib, reallığı dilə gətirib. Çoxları onun yığma ilə bağlı dediklərini başqa yerə yozdu, “biz 44 günlük Vətən müharibəsində qalib gələn ölkəyik” deyib, “xarakteri olmayan yığma” ifadəsi ilə razılaşmadı. Mən hələ də başa düşmürəm, Vətən müharibəsi hara, xaraktersiz yığma söhbəti hara...

Yenidən qayıdıram Samir bəyin azarkeşlərlə bağlı səsləndirdiyi fikirlərə. Abasov diplomat deyil, bu günə kimi də hansısa ölkədə fövqəladə səfir funksiyasını yerinə yetirməyib, heç konsul kreslosunda da əyləşməyib. Çılğın xarakterə malik baş məşqçidən hansısa məsələyə münasibət bildirərkən rəsmi cavab gözləmək, Roma Papasından müsəlmançılığı qəbul etməyi gözləmək kimi bir şeydi. O nəyi düşünüb, onu da dilinə gətirib. 8 ildən sonra “ağ-qaralar”a çempionluq sevinci yaşadan, cari mövsümdə gümüş medal qazandıran çalışdırıcı, heç şübhəsiz ki, nəyəsə əsaslanaraq o sözləri deyib. Ölkə kubokunun yarımfinal mərhələsinin cavab qarşılaşmasının hələ 7-ci dəqiqəsində bir qrup azarkeş, fanat, tərəfdar, sifariş yerinə yetirənlər (necə istəyirsiz, elə də başa düşün) baş məşqçinin ünvanına qeyri-etik şüarlar səsləndirib, onu istefatya səsləyirsə, şübhəsiz ki, Abasovun da əsəbləri tab gətirməyəcək, deyilənlərə qarşılıq verəcək. Bəli, Samir bəy “CBC Sport”un əməkdaşının sualını belə cavablandırmamalı, fikirlərini daha yumşaq formada çatdırmalı idi. Ancaq o bilirdi kimin ünvanına söz atırdı və həmin insanlar da o sözlərdən paylarını götürdülər.
Böyük ehtimalla Abasov mövsümün sonunda “Neftçi”dən ayrılacaq. O da ola bilər ki, bir müddət işsiz qalacaq. Ancaq onun işsiz günləri çox çəkməyəcək. Çünki öz üzərində işləməyi bacaran, müasir futbolun tələbləri ilə ayaqlaşan, bəziləri kimi amorf xüsusiyyətə malik biri deyil. İnanıram ki, o hələ ölkə futbolunda son sözünü deməyib.

RƏŞAD