Bəlkə də çoxlarına qəribə gələcək; 2021/22 mövsümü bitməmiş gələcək haqda danışmaq nəyə lazımdı?

Amma hadisələri qabaqlamaq gözəl şeydi. İnsan nələrisə baş verən situasiyalara görə təhlil edib, fikir yürütmək istəyir. Bundan sonra başlayır hadisələri diqqətlə izləməyə ki, söylədikləri doğru çıxsın. Yəqin ki, bir çox yazarlar bu fikrimlə razılaşar. Son bir ay ərzində Azərbaycan futbolunda gözəl proseslər baş verdi. Klublar Komitəsinin iclası oldu, Elxan Məmmədov FİFA-da vəzifəyə keçdi, AFFA-nın baş katibi Sərxan Hacıyev Şamaxıda jurnalistlərlə səmimi söhbət edib, ölkə futbolunun gələcəyi haqda danışdı. Hə, yadımdan çıxmamış deyim ki, VAR bütün detalları ilə birgə Azərbaycana gəldi. İndi Gənclər Liqasında və yoxlama oyunlarında sınaqdan keçirilir. Məhz bunların hamısını bir yerə topladım ki, növbəti mövsümün çox maraqlı olacağını deyə bilim. Öz müşahidələrimə əsasən hansı yeniliklərin olacağını diqqətinizə çatdırmaq istəyirəm.

Elə başlayaq VAR-dan. Artıq əminliklə deyə bilərik ki, bu sistem premyer-liqanın 2022/23 mövsümündə istifadə olunacaq. VAR ölkənin müxtəlif stadionlarında sınaqdan keçirilir və istifadəyə hazır vəziyyətə gətirilir. Hətta ola bilər ki, bu mövsüm Azərbaycan kubokunun finalında da bu sistemin xidmətinə ehtiyac duyulsun. VAR-ın olması ölkə futbolunda mübarizəni daha da gərginləşdirəcək. İndidən deyə bilərik ki, baş məşqçilər uğursuzluqlarını hakim səhvləri ilə ört-basdır etməyəcək. Ədalətsiz qərarların sayı azalacaq. Təbii ki, futbolumuzun müasirləşməsi yaxşı şeydi. Bütün dünyada və böyük turnirlərdə bu sistemdən istifadə olunursa, biz nə üçün etməyək? Nəticələr və uğur əldə etməkdə geri qalmışıqsa, heç olmasa, müasirləşmə baxımından dünya futboluna ayaq uyduraq.

Bu gün AFFA İcraiyyə Komitəsinin iclası keçiriləcək. Burda əsas qərar “Kəpəz”lə “Turan Tovuz”un premyer-liqaya vəsiqə qazanması ilə bağlı olacaq. Artıq bir çox AFFA rəsmisi - Elxan Məmmədov, Sərxan Hacıyev bunun siqnallarını verib. Qalıb Lisenziyalaşdırma Komissiyasının yekun qərarı açıqlaması. Açığı, mən hər iki klubun premyer-liqaya gəlməsinə sevinirəm. Çünki adı çəkilənlər bölgə təmsilçiləridi. Premyer-liqa sırf Bakı ətrafında olmayacaq. Onsuz da “Keşlə” də “Şamaxı”ya köçdü. Orda da azarkeşlərin bu idman növünə sevgisini hamı gördü. Gəncədə və Tovuzda hər oyun anşlaqın olacağını indidən söyləyə bilərik. Təbii ki, komandaların sayının artması çempionatdakı matçların da çoxalmasına səbəb olacaq. AFFA 4 dövrədən ibarət turnir təşkil etmək istəyir. Bu da 36 oyun deməkdi. Qarşılaşmaların sayının çoxalması komandaların inkişafına səbəb ola bilər. Amma baş məşqçilər nəticə əldə edə bilməyəndə sıx qrafikdən şikayətlənməsələr, yaxşıdı...

İcraiyyə Komitəsinin iclasında limitin dəyişdirilməsi də gözlənilir. Böyük ehtimalla yeni qayda belə olacaq: 7 legioner, 4 yerli futbolçu. Azərbaycanlılardan biri mütləq 21 yaşadək oyunçu olmalıdı. Düzdü, “Zirə” və “Neftçi” limitin tam ləğv edilməsini istəyir. Lakin AFFA bu riskə getməyəcək. Çünki futbolu zəif ölkələrdən 2-3 min dəyərində əcnəbiləri yığıb gətirmək bizimkilərin əlində uşaq oyuncağıdı. Bu da yerli futbolçuların kənarda qalmasına səbəb ola bilər. Məhz bu səbəbdən ən ideal varinat “7+4” sisteminin tətbiqi olardı.

Son olaraq, böyük ehtimalla əvəzetmə sayı 3-dən 5-ə qaldırılacaq. Düzdü, bunu əsasən Qurban Qurbanov istəyib. “Qarabağ”ın baş məşqçisi dəyişiklik sayının artmasının yerli futbolçuların inkişafına səbəb olacağını düşünür. Əslində bəzi çempionatlarda bu sistemdən yararlanırlar. Azərbaycan premyer-liqasında da bunun olması mümkündü. Sadəcə, zamanlama yanlışdı. Dünya futbolunda 5 əvəzetməyə keçidi koronavirus şərtləndirmişdi. Artıq pandemiya aradan çıxırsa, bizdə dəyişikliyə nə ehtiyac?

Yaxın gələcəkdə gözlənilən yeniliklər bunlardı. Qalanı Allahın işidi. Bir də AFFA-nın. Bəzən elə olur ki, Allahın işini bilmək olur, amma AFFA-nın yox. Elə bir fövqəladə hadisə baş verə bilər ki, dediklərimizin heç biri reallaşmasın. Bir çoxları üçün maraqlı ola bilər ki, nə üçün ancaq premyer-liqada baş verəcək yeniliklərdən danışdım. Divizonla bağlı nəsə gözlənilmir? Vallah, illərdi idman mediasındayam. Bu divizionda başverənlərdən hələ baş aça bilməmişəm. Yaxşısı budu, bu çempionat haqda mülahizə yürüdüb, özümü pis etməyim...

İLKİN SULTANLI