“Biz əcnəbi oyunçu limitinin artırılmasını təklif etmişik. Açığı, bu təkliflə hansısa imtiyaz əldə etmək fikrimiz yoxdu. Hazırda komandamızda olan yerli futbolçularla uzunmüddətli müqaviləmiz var və onların arasında perspektivli gənclər də kifayət qədərdi. Lakin qeyd etməliyəm ki, hazırkı limitin özünü doğrultmadığı bir neçə məqam var. Premyer-liqada futbolun keyfiyyəti aşağı düşür. Limitin yumşaldılması ilə meydanda daha keyfiyyətli futbolçuların ifasında daha yüksək səviyyəli oyunlar baş tutacaq ki, yerlilər də bu mühitdə inkişaf etmək imkanı qazanacaq. Azərbaycanlı futbolçuların maaşı çoxdu. Hazırkı limitdə bəzi oyunçulara pasportuna görə yüksək maaş verilir ki, bu da onların ölkə xaricinə çıxmaq istiqamətində motivasiyasının itməsinə səbəb olur. Təbii ki, bu amil milli komandalara, avrokuboklarda klubların çıxışına mənfi təsir göstərir. Klublar mövsümöncəsi heyəti idman prinsipləri əsasında yox, çempionatda tətbiq olunan limitə uyğun formalaşdırır. Bu amil də onların avrokuboklarla daha tez vidalaşmalarına və ölkə reytinqinə mənfi təsir göstərir. Yığmalarda “milliləşdirilən” futbolçuların sayı artır. Hazırkı limit daha çox rəqabətsiz futbolçular yetişdirir. Bunun da nəticəsində yığma daha çox xaricdə yetişən futbolçulardan asılı vəziyyətə düşür. Kimdəsə belə fikir yarana bilər ki, limit yumşaldılsa, çempionatda aşağı səviyyəli legionerlərin sayı artacaq. Lakin bunu da tənzimləmək mümkündü. Məsələn, klublardan 8-ci legionerdən sonra qeydiyyata alınacaq hər əcnəbi futbolçuya görə yüksək ödəniş tələbi, federasiya tərəfindən hər gənc futbolçunun xidmətindən istifadəyə görə klublara yüksək ödəniş və s. Mənə elə gəlir ki, inkişaf etməliyik, yerimizdə saya bilmərik. Hazırda tətbiq olunan limit artıq öz vaxtını başa vurub və xüsusi nəticə verməyib. Növbəti mövsümlərdə limit tədricən yumuşaldılmalı, premyer-liqa genişləndirilməli və klubların buna uyğunlaşması üçün münbit şərait yaradılmalıdı”.