Dünən Türkiyə çempionatının 34-cü turunun mərkəzi oyununda ''Adana Dəmirspor'' ''Trabzonspor''u qəbul etdi.

Trabzon təmsilçisi son həftələrdə enişdə olduğundan və ''Fənərbaxça'' ilə xal fərqi 8-ə endiyindən oyuna maraq çox böyük idi. Amma Türkiyə futbolunda əksər hallarda olduğu kimi hakim yenə maraqla gözlənilən bir matçın önünə keçdi. Görüşün əvvəllərində hakim Yaşar Kamal Uğurlu Simon Delinin yüngül toxunuşundan sonra Edin Visçanın yerə yıxılmasını penalti kimi dəyərləndirərək qalmaqallı bir qərar verdi. Türkiyənin bütün aparıcı futbol şərhçiləri və sabiq hakimlər bu epizodda penaltinin yanlış olduğunu dedilər. Abdülkadir Ömürün penaltisini adanalıların qapıçısı Muriç dəf etsə də, Uğurlu yenə sinəsini qabağa verdi. VAR-ın müdaxiləsindən sonra bu hakim zərbə zamanı oyunçuların cərimə meydançasına erkən daxil olduğunu bildirərək zərbəni təkrarlatdı. Bu dəfə Bruno Peres topu tora göndərdi. Bu epizoddan sonra sosial şəbəkələrdə ən çox müzakirə olunan şəxsə çevrilən Uğurlu hətta ''tvitter''də ''trend topic'' oldu! Amma Uğurlunun fiaskosu bununla bitmədi. 41 yaşlı ədalət təmsilçisi ilk yarıya 6 dəqiqə əlavə etdiyi vaxtda 4-cü dəqiqədə fitini səsləndirdi. Səhvini dərhal anlayan Uğurlu oyunçulardan üzrxahlıq edərək matçı davam etdirdi və qalan 1,5 dəqiqəni də oynatdı. Bu epizod bu hakimin oyuna psixoloji cəhətdən hazır olmadığını açıq-aydın ortaya qoydu. Bu hadisə 12-ci turda ''Qaziantep'' - ''Kasımpaşa'' matçında yaşanan olayı xatırlatdı. O vaxt hakim Halis Özkahya əsas vaxta 9 dəqiqə artırdığı halda 5-ci dəqiqədən sonra matçı bitirmişdi. Oyunçular paltardəyişmə otağına yollandıqdan sonra səhvini anlayan Özkahya onları geri çağıraraq qalan 4 dəqiqəni oynatmışdı. Böyük rezonans doğuran bu hadisənin ardından Özkahya hakimlik karyerasını bitirdiyini açıqlamışdı. Dünənki oyuna gəlincə, ''Trabzonspor'' 3:1 hesabı ilə qalib gələrək mühüm bir maneəni dəf etmiş oldu. Artıq bu komandanı çempionluqdan cəmi 1 xal ayırır.