Simon Kyaer on ay əvvəlki hərəkətinin layiqli əvəzini görüb.

Danimarka yığmsının müdafiəçisi İtaliya Futbolunun Şöhrət Zalına daxil edilib. İtaliya Futbol Federasiyasının saytının məlumatına görə, o, milli komandanın yarımmüdafiəçisi Kristian Eriksenin həyatını xilas etdiyinə görə “Davide Astori” mükafatını da alıb. Eriksenin ötən il başına gələn əhvalat çoxlarına bəllidi. Bilməyənlər üçün xatırladaq ki, o, AÇ-2020-nin qrup mərhələsinin iyunun 12-də Finlandiya ilə keçirilən matçında (0:1) huşunu itirərək yerə yıxılmış, Kristiana ilkin müdaxiləni Simon və komandanın həkimləri etmişdilər. O, meydandaca 15 dəqiqə ərzində təcili yardım aldıqdan sonra xəstəxanaya aparılmış və bir neçə gündən sonra ürək əməliyyatına məruz qalmışdı. Bu orqanına kardioverter-defibrilliator qoyulduğu üçün İtaliya çempionatında çıxış edə bilməyən futbolçu dekabrda “İnter”lə müqaviləsini pozmuşdu. Yanvarda “Brentford”la 6 aylığa anlaşan Kristian artıq milli komandadakı çıxışını da bərpa edib.

Maraq üçün Davide Astorinin “Kalyari”, “Roma” və “Fiorentina”da oynadığını, 2018-ci il martın 4-də 32 yaşında yuxudaca ürəktutmasından dünyasını dəyişdiyini də xatırladaq.