Region Liqasında sona doğru yaxınlaşırıq.

Turnirlə maraqlanan hər kəs qalibin kim olacağını düşünür. Bununla yanaşı, yazılan xəbərlərə görə, növbəti mövsümdən etibarən Region Liqasından bir neçə klub 1-ci diviziona, sonrakı “futbol ili”ndə isə premyer-liqaya gətiriləcək. Ölkənin ikinci dərəcəli çempionatında çıxış etməyə namizədlər arasında “Araz-Naxçıvan”ın da olduğu deyilir. Həm bu, həm də bizi maraqlandıran başqa sullara cavab tapmaq üçün komandanın baş məşqçisi Azər Bağırovla əlaqə saxladıq.

- Klubun büdcəsinin 1 milyon manat olduğu deyilir. Bu nə dərəcədə doğrudu?
- Büdcə ilə bağlı belə xəbərlər çox yayılır. Ancaq deyə bilərəm ki, bunların hamısı şayiələrdi. Bildiyiniz kimi, “Araz Naxçıvan” bu gün Region Liqasında mübarizə aparır. Hazırda nə lazımdısa, rəhbərlik tərəfindən təmin olunuruq. Belə bir turnirdə böyük məbləğlərdən danışılması mənasızdı.

- Muxtar Respublikada hazırda lider olsaz da, xal fərqi azdı. Bu mübarizədən qalib ayrıla biləcəksiz?
- Ümumilikdə Region Liqasında ən güclü komanda sayılırıq. Düşdüyümüz situasiya, keçirdiyimiz oyunlar da onu göstərdi ki, Naxçıvanda 8 komanda arasında bəzi keyfiyyətlərinə görə seçilən futbolçular bizdədi. Bu gün “Araz-Naxçıvan” regionda lider sayılır. Ən yaxın izləyicimiz olan “Arpaçay”ı 6:0 məğlub etmişdik.

- Bir aydan artıqdı komandaya rəhbərlik edirsiz.? Ordakı başqa klubların durumu ilə maraqlanırsız? Naxçıvandakı komandalar Azərbaycan futbolunun inkişafına töhfə verə bilər? Məsələn, “Arpaçay”. Ardıcıl 2 oyunu bu rəqibə qarşı keçirməlisiz. Büdrəmək ehtimalınız da var. Bu sizdə qorxu yaratmır?
- Demək olar ki, bütün komandaları izləmişəm. Bu günlərdədə AFFA-nın Naxçıvanda keçirdiyi U-14 liqasının final mərhəsi var. Bu liqalarda çox sayda perspektivli uşaq olduğunu görürük. Onlarla işləyib, Naxçıvanın və bütün Azərbaycanın diqqətinə çatdıracağıq.

- “Xan Lənkəran” – “Füzuli” cütünün qalibinin sizinlə oynayacağı gözlənilir. İdman ictimaiyyətinin fikrincə, rəqibin cənub təmsilçisi olmaq ehtimalı daha yüksəkdi. Siz bu haqda nə düşünürsüz? Hansı komandanın rəqibiniz olmasını istəyirsiz?
- 1/4 final qarşılaşması çərçivəsində “Xan Lənkəran”ın “Şirvanovka” ilə ev oyununu Lənkərana gedib izlədim. Sevindirici haldı ki, Region Liqasında belə komanda formalaşıb. Çox yaxşı olar ki, növbəti mövsümlərdə 1-ci diviziona, premyer-liqaya yüksəlsinlər. İzləyəndə gördüm ki, heyətdə hətta millidə çıxış etmiş təcrübəli futbolçular da var. Bu bir tərəfdən sevindirici haldı, digər tərəfdən də onlarla matça daha ciddi hazırlaşmağımız üçün müəyyən siqnallar verir. Əlimizdə olanların hamsı Naxçıvanın yerli futbolçularıdı. 2013-cü ildən burda böyük futbol yox kimi bir şey idi. Lakin yeni rəhbər Vüqar Abbasovun gəlişindən sonra bir çox uzunmmüdətli planların həyata keçirilməsinə başlanılıb.

- “Araz-Naxçıvan”ın Region Liqasındakı hədəfi nədi? Rəhbərlik qarşınıza çempionluq tələbi qoyub?
- Naxçıvana gəlişim klub və federasiyanın rəhbəri Vüqar Abbasovla görüşdən sonra həyata keçdi. Burda öz fikirlərimi söylədim. Vüqar bəy də planlarını, hansı işlərin həyata keçiriləcəyini dedi. Qarşımıza qoyulan əsas məqsəd Naxşıvanın gənc oyunçularından ibarət intizamlı, yaxşı komanda formalaşdırmaqdı. Uzunmüddətli planlar nəzərdə tutulduğundan rəhbərlik tərəfindən çempionluq tələb olunmayıb.

- Həm Zəngəzur, həm də Şərqi Zəngəzur dəhlizinin açılması “Araz-Naxçıvan”ın inkişafına nə dərcədə təsir edəcək?
- Bu məsələ həyata keçərsə, nəinki futbolun, həyatımızın bir çox sahəsi üçün təkan ola bilər. Naxçıvandan Türkiyə və İranla birlikdə bir çox işlər həyata keçirmək mümkün olacaq. Geniş əlaqələr yarada bilərik. Xüsusilə də Türkiyə klubları ilə. İstər transferlər, istər turnirlərin keçirilməsi, istərsə də təlim-məşq toplanışları bura daxildi.

- Hazırda “Araz-Naxçıvan”da iki afrikalı futbolçu var. Komandaya siz gələndən sonra cəlb olunublar, yoxsa əvvəlcədən var idi?
- Afrikalı futbolçularla bağlı gəldiyim gündən çox söz-söhbət yayıldı. Lakin burda heç bir əcnəbi oyunçu yoxdu. Yerli futbolçulardı. Düzdü, 3-4 oyunçu var ki, kənardan özüm gətirmişəm. Bildiyiniz, tanıdığınız futbolçulardı. Sadəcə, bu il Region Liqasında limitin dəyişməsi ilə bağlı, demək olar ki, heç kimi götürə bilməmişik. Amma çox istərdik ki, heyətə bir neçə oyunçu qatım. Növbəti mərhələdəki rəqibimizə qarşı daha hazırlıqlı olaq.

- Bəzi klublar, məsələn, “Xan Lənkəran, “Energetik” artıq 1-ci divizion üçün planlar qurmağa başlayıb. Deyilənə görə, “Araz-Naxçıvan” üçün də “yaşıl işıq yandırılıb”. Sizdə vəziyyət necədi, bu prosesə başlamısız?
- Hazırda çox şeydən danışmaq olar. Ancaq ortada reallıq var. Daha yüksək liqaya qalxmaq üçün ilk növbədə maddi bazanın yüksəldilməsi lazımdı. AFFA və PFL-in standartlarına cavab vermək lazımdı. Bütün bunlar yaxın gələcəkdə gerçəkləşərsə, klub rəhbəri bu qurumlara müraciət edəcək. Ancaq hazırda bu məsələ günəmdə yoxdu. Region Liqasında yarımfinala hazırlaşırıq.

SƏNƏM FƏRHADOVA